UP Mein Mahilaaon Ki Suraksha Par Uthe Savaal

Breaking »

UP Mein Mahilaaon Ki Suraksha Par Uthe Savaal

IANS . Lucknow beete December maheene mein Delhi mein hue gang-rape ghatna ke baad rape ke khilaaf banaae gaye kaanoon ke baavajood aisi ghatnaaon mein kami aati naheen dikh rahi. Desh ke doosare hisson ki tarah UP mein bhi haal ke dinon mein mahilaaon aur bachchiyon ke saath rape aur chhedchhaad ki badhti ghatna se police ki kaaryapranaali par savaal khade ho gaye hain. Sarkaar aur police lagaataar daava karti hai ki raajya mein mahilaaon ke khilaaf aparaadh kam ho rahe hain. Lekin sarkaari aankadon ke mutaabik raajya mein saal 2008 mein rape ke 1696 maamale saamane aae the, vaheen yah aankada saal 2009 mein 1552, 2010 mein 1290 , 2011 mein 1945 aur 2012 mein 1716 raha hai. Beete teen dinon mein raajya ke alag-alag jilon mein mahilaaon, kishoriyon aur bachchiyon ke saath rape aur chhedchhaad ke 10 se adhik maamale saamane aae hain. Pichhle 24 ghante ke dauraan prataapagadh jile mein do aur sidghaarthanagar evam seetaapur mein ek-ek naabaalig ladkiyon ke saath rape ke maamale saamane aae hain. Lucknow vivi ke poorv kulapati ruparekha varma ka kehna hai ki raajya mein agar mahilaaon ke khilaaf koi ghatna hoti hai, to police pehle peedit paksh ko dabaane ki koshish karti hai. Agar media ke dabaav mein maamala darj bhi kar liya to aaropiyon ko bachaane ki koshish ki jaati hai. Varma ne kaha ki ladkiyon ke man mein baithe dar ko nikaalne ke liye aaropiyon aur inhein sanrakshan dene vaale policekarmiyon ke khilaaf bhi tatkaal kade kadam uthaae jaane ki jaroorat hai. Raajya ke retired police mahaanireekshak es aar daaraapuri kehte hain ki raajya sarkaar aparaadh ke aankade kam dikhaana chaahati hai. Jisse kai maamale darj naheen kiye jaate aur aaropi bekhauf ghoomate hain aur ghatnaaon ko anjaam dete hain. Daaraapuri ne kaha ki main naheen maanata ki hamaara kaanoon lachar hai. Kami iske kriyaanvayan mein hai. Agar police prashaasan svatantr roop se mukadama likhkar sahi dhang se jaanch kar adaalat mein prabhaavi pairavi kare to doshiyon ko kathor saja milegi. Aparaadhiyon ke man mein kaanoon ka dar badhega.

UP Mein Mahilaaon Ki Suraksha Par Uthe Savaal https://www.angrejinews.com/pic/6566