Sunishchit Karein, Musharraf Desh Chhodne Na Paaen Supreme Court

World »

Sunishchit Karein, Musharraf Desh Chhodne Na Paaen Supreme Court

Islamabad. . Pakistan Supreme court ne somvaar ko sarkaar ko yah sunishchit karne ka nirdesh diya ki poorv sainya shaasak Parvez musharraf desh chhodne naheen paae kyonki unke khilaaf raashtradoh ka mukadama chalaane ki maang karne waali kai yaachikaaon par sunavaai shuroo ho gayi hai. Musharraf ke khilaaf samvidhaan ki bhaavana ko aahat karne aur 2007 mein aapaatakaal lagaane ki maang karne waali yaachikaaon par Supreme court mein aaj sunavaai shuroo ho gayi hai. Justice jaaved S khwaaja ki adhyakshata waali do sadasyeeya bench ne gruh sachiv ko aadesh diya ki vah musharraf ko videsh jaane se rokane ke liye kadam uthaaen. Supreme court se raashtradoh (dand ) adhiniyam 1973 ke tahat musharraf par mukadama chalaane ka sarkaar ko nirdesh diye jaane ki appeal karne waali 5 yaachikaaon par shuruaati sunavaai ke baad bench ne yah nirdesh jaari kiye. Bench ne sarkaar, musharraf tatha anya prativaadiyon ko bhi notice jaari kiye aur maamale ki sunavaai kal tak ke liye sthagit kar di. Yaachikaaon mein kaha gaya hai ki poorv sainya shaasak ne 2007 mein aapaatakaal ghoshit kar samvidhaan ka ullanghan kiya hai aur unke khilaaf raashtradoh ka mukadama chalaaya jaana chaahiye. Yaachikaakartaaon ne kaha hai ki sansad ke oopari sadan ne January 2012 mein ek prastaav paarit kiya tha ki musharraf ko svadesh vaapasi par giraftaar kiya jaana chaahiye lekin sarkaar ne ise sveekaar naheen kiya. Yaachikaaen daakhil karne vaale vakeelon ne yah tark bhi diya ki sarkaar Supreme court dvaara poorv mein diye gaye us aadesh par bhi kaarravaai karne mein vifal rahi hai jismein prashaasan ko samvidhaan ka ullanghan karne ke liye musharraf ke khilaaf kaarravaai karne ka nirdesh diya gaya tha.

Sunishchit Karein, Musharraf Desh Chhodne Na Paaen Supreme Court https://www.angrejinews.com/pic/4854