Sensex Mein Aath Ankon Ki Giraavat

Business »

Sensex Mein Aath Ankon Ki Giraavat

Mumbai: Desh ke share baajaaron mein shukravaar ko bhi giraavat ka rukh raha. Sensex 8.35 ankon ki giraavat ke saath 19,317.01 par aur Nifty 1.95 ankon ki giraavat ke saath 5,850.30 par band huaa. Mumbai stock exchange (BSE) ka 30 sheyaron par aadhaarit samvedi soochakaank Sensex 16.54 ankon ki teji ke saath 19,341.90 par khula aur 8.35 ankon ya 0.04 feesadi giraavat ke saath 19,317.01 par band huaa. Sensex ne din bhar ke kaarobaar mein 19,401.75 ke oopari aur 19,289.83 ke nichle star ko chhuaa. National stock exchange (NSE) ka 50 sheyaron par aadhaarit samvedi soochakaank Nifty 14.30 ankon ki giraavat ke saath 5,837.95 par khula aur 1.95 ankon ya 0.03 feesadi giraavat ke saath 5,850.30 par band huaa. Nifty ne din bhar ke kaarobaar mein 5,873.80 ke oopari aur 5,835.80 ke nichle star ko chhuaa. BSE ke midcap aur smallcap soochakaankon mein maamooli teji rahi. Midcap 1.59 ankon ki teji ke saath 6,609.03 par aur smallcap 7.15 ankon ki teji ke saath 6,564.76 par band huaa.

Sensex Mein Aath Ankon Ki Giraavat https://www.angrejinews.com/pic/2556