Ricky Ponting Honge Mumbai Indians Ke Kaptaan

Cricket » Thursday, February 21, 2013

Nai Delhi: Australia ke poorv kaptaan Ricky ponting 3 April se shuroo hone vaale chhathe Indian Premier league mein Mumbai Indians ka netrutv kareinge. Unhein Harbhajan Singh ke sthaan par team ka kaptaan niyukt kiya gaya hai. Pichhle saal antararaashtreeya cricket se sannyaas lene vaale ponting ko Mumbai Indians ne chennai mein is maheene ke shuroo mein hui neelaami mein unke aadhaar moolya 400,000 dollar mein khareeda tha. Mumbai Indians ne bayaan mein kaha ki ponting ko aagaami satr ke liye kaptaan banaane ka faisala nav niyukt cheef mentor anil Kumble, mukhya coach jaan right aur aaikan khilaadi sachin Tendulkar se salaah mashavira karne ke baad kiya gaya. Kumble ne bayaan mein kaha, ''Ricky ke paas IPL mein Mumbai Indians jaisi pratispardhi aur choti ki team ki aguvaai karne ke liye paryaapt anubhav hai. Sachin mere is sujhaav se poori tarah se sahamat the ki kaptaani ke daayitv ke bina jab vah ballebaaji vibhaag ki aguvaai kareinge to Mumbai Indians ko adhik faayda hoga. Ricky ko Mumbai Indians ka kaptaan banaane ka aaidiya hamaara (sachin aur mera) tha. '' Mumbai Indians mein apni nai bhoomika ke baare mein ponting ne kaha, ''Yah bada sammaan hai. Meri kshamata par vishvaas dikhaane ke liye main misej (neeta) Ambani aur Mumbai Indians prabandhan ka aabhaar vyakt karta hoon. ''(input bhaasha se bhi)