Rampur Se UP Mein Ubaal Laaenge Amit Shaah

India »

Rampur Se UP Mein Ubaal Laaenge Amit Shaah

nadeem . Lucknow Narendra Modi ke numaainde ke taur par dekhe ja rahe amit shaah ki UP ki siyaasat bismillaah Rampur se shuroo hogi. Vah 29 May ko Rampur jile mein BJP ke jail bharo aandolan ki aguvaai kareinge. UP ka prabhaari banaae jaane ke baad vah pehli baar soobe mein party ke kisi saarvajanik kaaryakram mein hissa leinge. Majahabi aadhaar par dhruveekaran: BJP ki yah rananeeti keval ek Loksabha seat ke liye naheen hai balki vah poore pradesh mein yahi rananeeti apna chaahati hai. Filhaal UP ke jo raajaneetik haalaat hain, usamein BJP ko usi soorat mein faayda ho sakta hai jab voton ka dhaarmik aadhaar par dhuraveekaran ho. Amit shaah ko raajya ka prabhaari banaae jaane ke peechhe bhi party ki yahi soch hai. Modi apni vyastata ke chalte UP ke har jile ke liye vakt naheen day sakte, lekin shaah jab poore UP ko matheinge to musalmaanon mein usi tarah ka ubaal aane ki baat kahi ja rahi hai, jaise Modi ki maujoodagi se hoti. Isi vajah se 29 May ko amit shaah ki Rampur jile mein jail bharo aandolan mein shirkat ke baad kai doosare muslim bahul jilon mein unke kaaryakram aayojit karaae jaane ki taiyaari hai. Rampur hi kyon : Shaah ke liye Rampur ko hi kyon chuna gaya, iske raajaneetik maayane nikaale ja rahe hain. Rampur UP ka sabse jyaada muslim aabaadi vaala jila hai. Saath hi samaajavaadi party ke muslim chehare kahe jaane vaale fire braind neta aajam Khan aur Congress ki noor baano ka ilaaka bhi yahi hai. Modi ko lekar musalmaanon ka jis tarah ka najariya hai, usamein unke pratinidhi ke taur par shaah ki maujoodagi musalmaanon ke laamaband hone ka sabab ban sakti hai aur BJP ko isi mauke ka intajaar hai. Dhaarmik aadhaar par voton ke dhuraveekaran se BJP ko faayda hota raha hai. Rampur ke chunaavi ateet par agar najar daali jaae to pichhle nau Loksabha chunaavon mein se sirf do baar BJP ko yahaan tabhi jeet mil saki, jab yahaan dhaarmik aadhaar par voton ka dhuraveekaran huaa. Paanch chunaav Congress ne jeete hain, jabki pichhle do chunaavon se yahaan par SP jeet rahi hai.

Rampur Se UP Mein Ubaal Laaenge Amit Shaah https://www.angrejinews.com/pic/9328