Rally Vasundhara Ki, Chha Gaye Modi

India »

Rally Vasundhara Ki, Chha Gaye Modi

gulashan rai khatri. Udaipur Udaipur ke kumbhalagadh mein rally ka aayojan to kiya gaya tha vasundhara suraaj sankalp yaatra ke liye, lekin is rally mein bhi Narendra Modi hi chhaae rahe. Dilchasp yah huaa ki jab is rally ko sambodhit karne ke liye BJP adhyaksh Rajnath Singh manch par pahunche to usase theek pehle aage baithe kaaryakartaaon ne Modi-Modi ke naare lagaane shuroo kar diye. Haalat yah ho gayi ki kaaryakartaaon ki naarebaaji ko kuchh der bardaasht karne ke baad Rajnath Singh ko kade shabdon mein kaaryakartaaon ko chup rahane ke liye kehna pada. Kaheen planning to naheen : Jis tarah se manch ke theek saamane baithe kaaryakartaaon ne naarebaaji ki, usase yah bhi savaal uthane laga hai ki yah naarebaaji kya achaanak utsaahi kaaryakartaaon ne shuroo ki ya fir baakaayada planning ke tahat Rajnath Singh ke saamane is tarah ki naarebaaji karaai gayi. Gaurtalab hai ki isse pehle yashavant sinha aur shatrughn sinha ne bhi Modi ko PM project karne ke liye bayaanbaaji ki thi aur us vakt bhi aakhirkaar party adhyaksh ko is baare mein kade shabdon mein chetaavani deni padi thi. Lekin guruvaar ko vasundhara raaje sindhiya ki rally mein hui is tarah ki naarebaaji se khud Rajnath Singh ko asahaj sthiti ka saamana karna pada. Naarebaaji kyon : Naarebaaji ko lekar bhi savaal uthaae ja rahe hain. Iski vajah yah hai ki subah chal rahi is rally ko party ke kai raajya or raashtreeya star ke netaaon ne sambodhit kiya lekin kisi bhi vakta ke saamane is tarah ki naarebaaji naheen ki gayi. Rally ke ant mein jab Rajnath Singh manch par bolna shuroo karne hi vaale the ki kaaryakartaaon ke ek group ne Modi-Modi ke naare lagaane shuroo kar diye. Unki dekhaadekhi baad mein kai aur kaaryakartaaon ne bhi unka saath dena shuroo kar diya. Haalaanki shuroo mein Rajnath Singh ne muskaraate hue kaaryakartaaon ko 'Theek hai-theek hai' kehkar shaant karne ki koshish ki, lekin unka koi asar naheen huaa aur jab fir kaaryakarta Modi ke naam ke naare lagaane lage, tab Rajnath sih ne kade shabdon mein kaha ki theek hai aapki baat sun li gayi hai aur ab aap shaant ho jaaen. Party adhyaksh ke tevaron ko dekhne ke baad hi ye kaaryakarta shaant hue. Kise faayda : Yah bhi savaal uthaaya ja raha hai ki Modi ke paksh mein is naarebaaji ko lekar kise faayda ho sakta hai. Haalaanki raajya ke kai neta ise raajya mein BJP ki androoni raajaneeti se jodkar ise dekh rahe hain lekin jyaadaatar logon ka maanana hai ki sambhavat: Yah kaaryakarta, desh bhar ke kaaryakartaaon ki bhaavanaaen jaahir kar rahe the. Iski vajah yah hai ki Modi ke paksh mein naarebaaji karaane ka yahaan koi auchitya naheen hai. Lekin itna jaroor hai ki kuchh log yah jaroor chaahate honge ki is naarebaaji ki vajah se na sirf media, balki party aalaakamaan tak bhi yah sandesh jaae ki party mein neta bhale hi kuchh bhi sochein lekin kaaryakartaaon ko yah lagne laga hai ki Modi hi aise neta hain, jo is vakt BJP ko satta tak le ja sakte hain.

Rally Vasundhara Ki, Chha Gaye Modi https://www.angrejinews.com/pic/4537