Raajaneetik Dalon Ne Ki Dhamaakon Ki Ninda Pradhaanamantri Ne Kaha, Bakhsha Naheen Jaaega

Breaking »

Raajaneetik Dalon Ne Ki Dhamaakon Ki Ninda  Pradhaanamantri Ne Kaha, Bakhsha Naheen Jaaega

Nai Delhi: Raajaneetik dalon ne guruvaar raat Hyderabad mein hue bam visfoton ki kadi ninda ki jabki pradhaanamantri Manmohan Singh ne kaha ki 'Kaayaraana harkat' ke liye jimmedaar logon ko bakhsha naheen jaaega. Pradhaanamantri ne kaha, ''Yah ek kaayaraana hamla hai, doshiyon ko bakhsha naheen jaaega. '' hamlon ki ninda karte hue uparaashtrapati haamid Ansari ne peediton ke parijanon ke prati apni samvedna jaahir ki. Singh tatha Ansari donon ne janta se sankat ki is ghadi mein shaanti aur sauhaard banaae rakhane ki appeal ki. Pradhaanamantri ne visfoton mein maare gaye logon ke parijanon ko pradhaanamantri raahat kosh se do-do lakh rupaye tatha gambhir roop se ghaayal hue logon ko 50-50 hajaar rupaye diye jaane ki ghoshana ki. Congress adhyaksh soniya Gandhi ne Hyderabad mein hue visfoton par dukh aur aakrosh jaahir kiya. Bhaajapa adhyaksh Rajnath Singh ne peediton ke parijanon ko saantvana dete hue visfoton ki gahan jaanch karaaye jaane ki maang ki. Singh ne kaha, ''Yah ek nindaneeya ghatna hai. Main ummeed karta hoon ki sarkaar ghaayalon ko tatkaal paryaapt sahaayata muhaiya karaane ke liye uchit kadam uthaaegi. '' Loksabha speaker meera Kumar ne bhi visfoton mein maare gaye logon ke prati shok jataaya aur parijanon ke prati samvedna jaahir ki. Paryatan mantri ke chiranjeevi ne visfoton ki ninda ki. Unhonne Andhra pradesh ke mukhyamantri ke kiran Kumar Reddy se iski gahan jaanch karaane tatha doshiyon ke khilaaf kaarravaai kiye jaane ko kaha.

Raajaneetik Dalon Ne Ki Dhamaakon Ki Ninda Pradhaanamantri Ne Kaha, Bakhsha Naheen Jaaega https://www.angrejinews.com/pic/2517