Pustak-parichay 'Tum Chup Kyon Rahe Kedaar - Ek Traasadi Ki Yaad

Breaking »

Pustak-parichay  'Tum Chup Kyon Rahe Kedaar - Ek Traasadi Ki Yaad

Nai Delhi: theek ek saal pehle 16 June ki raat aur 17 June ki subah kedaaranaath ke oopar se aae sailaab ne uttaraakhand ke ek bade hisse ko tahas-nahas kar diya. Himaalaya mein aisi tabaahi kabhi kisi ne dekhi naheen thi. Pahaad dhah-dhahakar girte rahe, nadiyaan apne veg se badi-badi imaaraton ko malabon mein badalti hui apne saath bahaati le gain. Saikadon vargameel ka ilaaka jaise shmashaan mein badal gaya. Is tabaahi ke beech NDTV India ke reporter hrudayesh Joshi vah pehle shakhs the, jo in ilaakon ka jaayaza lete hue kedaar ghaati aur kedaaranaath tak pahunche. Cheekhati hui sanasaneekhej reporting ke is daur mein hrudayesh Joshi ne bade samvedansheel dhang se is traasadi ke vibhinn pahaluon ko pakada, pesh kiya aur yeh samajhne ki koshish ki ki aakhir himaalaya jaisi viraat yeh traasadi kyon ghatit hui. reporting ka vah daur beet jaane ke baad bhi kedaaranaath ke savaal hrudayesh Joshi ka peechha karte rahe. Kedaaranaath traasadi ke redimed javaabon se vah santusht naheen the. Aakhirkaar unhonne apne shodh ko aur vistaar diya aur antat is par ek poori kitaab likh daali - 'Tum chup kyon rahe kedaar' is kitaab se guzarate hue saal bhar pehle ghati us poori traasadi ki tasveer nae sire se ubhar aati hai. Hrudayesh Joshi badi tanmayata se bataate hain ki us traasadi ka saamana karne mein shuruaati dinon mein kaise raajya ki vyavastha poori tarah naakaam rahi aur kaise aam gaanv vaalon ki apni saamoohikta ne fanse hue logon ki madad ki. Vah yeh dekh paate hain ki jis vakt bhaarateeya sena ke pilot apni jaan jokhim mein daalkar aur ek ke baad ek udaanein bharate hue logon ki jaan bachaane mein lage hue the, us vakt sena ke ek general teen helicopter lekar aae, lekin unhonne kisi ko apne saath surakshit jagah pahunchaane ki jahamat mol naheen li. lekin kitaab ka mol jitna in bilkul saamayik byoron mein hai, usase kuchh jyaada is padataal mein ki aakhir yeh traasadi kyon ghatit hui. Haadase ke pehle hi din se is savaal ke kai jaane-pahachaane javaab de diye gaye - ise ishvar ka prakop bataane se lekar prakruti ke saath kiye gaye khilvaad ka nateeja tak kaha gaya. Daraasal apni-apni aastha aur apne-apne vivek ke beech log apna-apna tark chun rahe the, lekin hrudayesh is baat ko samajhte hain ki himaalaya ka yeh hissa yahaan ke sthaaneeya logon ke liye ek bhaugolik avasthiti-bhar naheen hai, ek aadhyaatmik upasthiti bhi hai - log tamaam sankaton aur mushkilon ke beech isse shakti aur aastha donon haasil karte hain. Yahi vajah hai ki vah kitaab ka sheershak chunate hue kedaaranaath ki isi aadhyaatmik upasthiti ko sambodhit kar rahe hote hain. lekin is aadhyaatmik anubhav ko hrudayesh Joshi apne paanv ki bedi naheen banaate. Vah badi baareeki se is baat ka muaayana karte hain ki traasadi ki taatkaalik aur dooragaami vajahein kya-kya raheen aur kaise ek praakrutik parightana ek maanaveeya traasadi mein parivrtit ho gayi. Himaalaya ke kshetr mein praakrutik todafod aur parivartan ka itihaas puraana hai. Iski god mein palane waali sanskrutiyaan iski is samvedansheel bhaugolik prakruti ka sammaan karti raheen aur in badlaavon ke liye paryaapt jagah bachaae rakhati raheen. Lekin 20veen sadi ke uttaraarddh mein jaise-jaise teerthaatan paryatan mein badalta gaya, jaise-jaise dharm ka kaarobaari istemaal bada, jaise-jaise kedaaranaath ki yaatra ko hotel udyog ke havaale kar diya gaya, vaise-vaise himaalaya ki bhangurata bhi badhi aur vah jagah bhi ghati, jahaan pahaad apne paanv faila paata, nadi apne kandhe khol paati. Jab traasadi hui, tab lagaataar ho rahi baarish ke beech mausam vibhaag ki chetaavani ki har kisi ne upeksha ki. Na sailaaniyon ne ise gambheerta se liya, na sarkaar ne. Shaayad khud mausam vibhaag bhi is abhyaas ka maara raha ki usane chetaavani dekar apna daayitv poora kar liya hai - ab ise koi sune ya na sune. kul milaakar is traasadi ne nae sire se yaad dilaaya ki ham bhaarateeya jan kaise jeevan ke prati aaparaadhik laaparavaahi baratne waali jeevanashaili ke aadi ho chale hain. Jo traasadi saaf taur par nazar aa gayi, vah us traasadi ke mukaabale chhoti hai, jo chupachaap barso se himaalaya ki vaadiyon mein ghatit ho rahi hai. Hrudayesh Joshi ki kitaab sirf kedaaranaath ko aavaaz naheen deti, vah ham sabse appeal karti hai ki is traasadi ko samajhein aur apne-aap ko badalein. Kareeb 200 prushthon ki is kitaab ka 14 June ko lokaarpan ho raha hai. 'Tum chup kyon rahe kedaar' lekhak : Hrudayesh Joshi aalekh prakaashan, 395 rupaye.

Pustak-parichay 'Tum Chup Kyon Rahe Kedaar - Ek Traasadi Ki Yaad https://www.angrejinews.com/pic/53439