Pati Ko Maarane Waali Patni Ko Umrakaid Ki Saja

Breaking » Monday, April 22, 2013

Surendr Kumar jeend. . Atirikt jila evam satr nyaayaadheesh sandeep garg ki adaalat ne jahar dekar pati ki hatya karne waali patni tatha uske premi ko aajeevan kaaraavaas ki saja sunaai hai. Iske saath hi mrutak ki patni ko 20 hajaar rupae jabki uske premi ko 10 hajaar rupae jurmaane ki saja sunaai hai. Jurmaana ada na karne par donon ko chhah maheene ka atirikt kaaraavaas bhugatna hoga. Gaanv dudaana nivaasi harajindr Singh ne 13 July 2011 ko aleva thaana police ko di shikaayat mein bataaya tha ki uske bhaai Kuldeep ki shaadi asandh nivaasi balajindr Kaur ke saath hui thi. Usaka bhaai Kuldeep Qatar doha mein kaarya karta tha. 18 April 2011 Kuldeep Qatar se gaanv vaapas lauta tha. Usi shaam apni patni balajindr Kaur ko sasuraal asandh se lekar aaya tha. Iske baad, 19 April subah sandigdh paristhitiyon ke chalte Kuldeep ki karanaal ke niji aspataal mein upachaar ke dauraan maut ho gayi thi. Mrutak ke bhaai harajindr ne Kuldeep ki maut par sandeh jataaya tha. Police ne maamala bisre ki report par chhod diya tha. Bisre ki report mein jahar ki baat saamane aane par safeedon ke tatkaaleen DSP vireindr saangavaan ne maamale ko sandigdh maankar jaanch ko aage badhaaya aur mrutak ki patni balajindr Kaur tatha uske premi naravair Singh ko poochhataachh ke liye hiraasat mein le liya. Poochhataachh mein khulaasa huaa tha ki balajindr Kaur ka gaanv khijraabaad nivaasi naravair Singh ke saath avaidh sambandh tha. Kuldeep jab Qatar se vaapas lauta to balajindr maayake asandh mein thi. Balajindr ne yojanaabaddh tareeke se Kuldeep ko chai mein nasheeli davaai pila di. Sasuraal se ghar lautane par Kuldeep ka sir chakaraane laga. Jiska faayda uthaakar raat ko balajindr ne apne pati Kuldeep ko jahareeli goliyaan khila di thi. Kuldeep ki shaadi 22 December 2010 ko asandh nivaasi balajindr Kaur ke saath hui thi. Balajindr ke pehle se hi khijraabaad nivaasi naravair ke saath avaidh sambandh the. Police ne mrutak ke bhaai harajindr ki shikaayat par police ne 13 July 2011 ko balajindr Kaur tatha uske premi naravair ke khilaaf hatya, shav ko khurd burd karne ka maamala darj kar giraftaar kar liya tha. Tabhi se maamala adaalat mein vichaaraadheen tha.