Narendra Modi Ka Raajaneetik Safar Jitni Hui Laanat Malaamat, Utana Hi Badha Kad

Breaking » Friday, May 16, 2014

Ahmedabad: Bhaarat ke agale pradhaanamantri Narendra Modi ki yaatra ek aise vyakti ki asaadhaaran gaatha hai, jiski virodhiyon ne jitni laanat malaamat ki utana hi uske samarthakon ne use chaaha. Jiske samarthakon ka kehna hai ki ek vahi hain jo desh ko jhanjhaavaaton se nikaal le jaaega. Narendra Modi ko satta ke sheersh par pahunchaane vaale unke athak aur lakshya keindrit chunaav abhiyaan ke dauraan unhonne kaha tha, 'Mujhe vishvaas hai ki ishvar ne mujhe chuna hai. ' apne jabaradast chunaav prachaar abhiyaan ke dauraan 63 varsheeya Modi ne khud apni aankhon se Congress virodh aur uske saath hi NDA ke jordaar samarthan ki aandhi ko mahasoos kiya. taanaashaah hone ke aarop ko khaarij karte hue Modi ne prachaar abhiyaan ke dauraan kaha tha ki vah team vark mein vishvaas rakhate hain aur jo log unke saath kaam kar chuke hain vah jaante hain ki vah ek majaboot ichhaashakti vaale nirnaya lene vaale vyakti hain. Modi ne apne virodhiyon par aarop lagaaya tha ki vah unapar hamle karne ke liye bahut hi aspasht, vaiyaktik aur fijool aarop lagaate hain aur unhein taanaashaah, vibhaajanakaari aur behad kattar bataate hain. Unka kehna tha ki unke khilaaf bhrashtaachaar, bhaai-bhateejaavaad ya aksham hone jaisa koi bhi gambhir aarop naheen hai. party ke keindreeya netrutv ke 'Delhi club' mein ek baahari vyakti ki haisiyat rakhane vaale Modi ne party ke bheetar aur baahar unhein lekar hue saare virodh ko, BJP ke liye kendra mein sarkaar banaane ke vaaste jaroori bahumat se bhi jyaada seatein jutaakar ek tarah se dhata bata di. BJP ne unke netrutv mein jabaradast bahumat praapt karne ka aisa kaarnaama anjaam diya hai, jaisa 1984 mein Rajiv Gandhi ke netrutv mein Congress ne 400 se jyaada seaton par jeet darj kar kiya tha aur aisa is beech koi bhi anya dal naheen kar paaya. Lal Krishna Advani jaise party ke varishth neta aur anya ke virodh ka saamana karne ke baavajood 63 saal ke sangh prachaarak Modi ne solahaveen Loksabha ke chunaav ke liye deshbhar mein aisa athak abhiyaan chalaaya jis par savaar hokar bhaarateeya janta party ne apna ab tak ka sabse badhiya pradarshan kiya. Desh ki raajaneeti mein pichhle teen dashak se maujood rahi, party abhi tak kabhi itni shaanadaar jeet darj naheen kar pai thi. Modi ko jab September mein party ka pradhaanamantri pad ka ummeedavaar ghoshit kiya gaya, tab bhi unka kaafi virodh hua tha, lekin yeh virodh unhein BJP ko 2004 ke baad dobaara sattaaseen karne ke unke lakshya se diga naheen paaya. shuruaat mein is baat ko lekar kaafi sandeh jataaya gaya tha ki Modi varishth bhaajapa neta atal bihaari Vajpayee ke prabhaamandal ki baraabari kar paaenge ya naheen. Vajpayee ko unke pratidvandvi bhi kaafi udaaravaadi maanate the aur unki vajah se sahayogi dal bhi NDA ke saath jutate the. Lekin, BJP ne Modi par poora bharosa kiya aur us bharose ke badle mein party ko chunaav se poorv hi pehle se jyaada dalon ka sahayog milna shuroo ho gaya. Khaastaur se un dalon ka bhi, jinhonne 2002 ke Gujarat dangon ke liye Modi ko aaropi thaharaakar NDA se naata tod liya tha. doosare dal ya unke virodhi beshak Modi ko samaaj ko baantane vaale, dhruveekaran karne vaale aur kattar hindutvavaadi aur Gujarat ke musalmaan virodhi dange ke liye aaropi jaise sanbodhanon se sambodhit karte hon, lekin Modi ke samarthak unhein 'Ek aisa majaboot neta' maanate hain, jo kabhi bhi vipkshiyon dvaara apnaai jaane waali tushtikran ki raajaneeti naheen karega. Gujarat ke mukhyamantri ke pad par apne kareeb 12 saal ke kaaryakaal ke dauraan Modi ne apni chhavi ek aise neta ke roop mein gadhi jiske paas pichhle kuchh varshon se 'Neetigat jadta' se joojh rahe desh ka shaasan chalaane ke liye ek vaikalpik drushtikon hai. Apne prachaar abhiyaan ke dauraan vikaas ko apna mukhya mudda banaate hue Modi ne desh ki yuva shakti, madhyavarg aur graameen logon ko 'Badlaav ki bayaar' laane ka bharosa dilaane ke liye sampark saadhane ki purajor koshish ki aur shaayad unki yahi koshish rang laai, haalaanki beech-beech mein kabhi kabhaar bhagava taakaton ke kuchh pasandeeda vishyon ko uthaakar matadaataaon ka dhruveekaran karne ki koshishein bhi unke abhiyaan mein dikheen. ek kushal yojanaakaar Modi ne, railway station par chai bechne vaale se lekar Bhaarat ka ek lokapriya neta banane tak ka safar badi safalta se poora kiya, haalaanki unke bahut se virodhi unke is daave se sahamat naheen hain ki vah kabhi chai bhi becha karte the. sangh parivaar ki 'Hindutv ki prayogashaala' maane jaane vaale raajya mein Modi ne mukhyamantri ke taur par apni chhavi ek kattarpanthi ki banaai thi, jo lagaataar teen baar chunaav dar chunaav apni vijay ka paracham laharaata raha. Loksabha chunaav mein alpasakhyakon, khaastaur par musalmaanon ka samarthan haasil karne ke liye unhonne jaante boojhate apni kattar hindutvavaadi chhavi ko tyaag diya aur apna poora dhyaan vikaas ke mudde, khaastaur se gareeb musalmaanon ke vikaas par keindrit kiya. party ka pradhaanamantri pad ka pratyaashi ghoshit kiye jaane ko lekar hue virodh se beparavaah Modi ne aam chunaav ke liye chaturaai se ek aisa athak aur high-tech prachaar abhiyaan chalaaya jaisa pehle kabhi naheen dekha gaya. Is abhiyaan ke tahat unhonne deshbhar mein 450 se jyaada railiyon ko sambodhit kiya. Gujarat ke Mehsana ke aitihaasik vaadanagar shahar mein pichhde 'Modh ghaanchi' (teli) samudaaya mein janmein Modi ka ubhaar ek asaadhaaran ghatna hai, haalaanki unke bahut se virodhi unke pichhde samudaaya se sambaddh hone ki baat ko bhi naheen maanate. sangh ke prachaarak auer 1985 mein BJP mein kaam karne ke liye bheje gaye Modi Gujarat ke mukhyamantri pad par October 2001 mein kaabij hone se pehle tak party ke aise padaadhikaari the, jo parde ke peechhe kaam karte the oair party ke liye rananeeti taiyaar karte the. Unke mukhyamantri ka pad sambhaalne ke sirf paanch maheene baad 2002 mein saabaramati express ke ek dibbe mein aag lagne aur usamein 59 kaarasevakon ki maut hone ke baad bhadke Gujarat dangon ke maamalon mein unki chhavi ek vivaadaaspad neta ki bani. unapar dangon ke dauraan akarmanya bane rahane ka aarop laga, lekin us kaand ki jaanch ke liye bani sabhi jaanch samitiyon ne jaanch ke baad unhein sabhi aaropon se mukt kar diya. Inmein Supreme court ki seedhi nigraani mein gathit vishesh jaanch dal ki report bhi shaamil hai. Gujarat mein hui farji muthabhedon ke mudde par bhi Modi par lagaataar aarop lagte rahe hain oair unke kareebi sahayogi amit shaah ne to haal tak in aaropon ka saamana kiya, lekin Modi pratikoolata paristhitiyon ko avsaron mein badalne ki kala ko bakhoobi jaante hain. Unhonne Gujarat mein kuchh aisi vikaas yojanaaon ko anjaam diya, jinke chalte unhein 2007 aur 2012 mein apaar janasamarthan mila. Modi ka daava hai ki unhonne apni pehchaan ko nae sire se talaashane ki prakriya mein vikaas ke mudde ko samoochi raajaneeti ke kendra mein la diya hai. Supreme court dvaara niyukt vishesh jaanch dal ki or se Gujarat mein 2002 mein hue dangon ke maamale se unhein Pak saaf karaar diye jaane ke baad Modi ne Gujarat mein musalmaanon tak pahunch banaane ke liye 'Sadbhaavana upavaas' rakha. Aise hi upavaas unhonne Gujarat ke anya shaharon mein bhi kiye. Modi Gujarat ke vikaas model ka khoob dhindhora peetate rahe hain aur saath hi apni sarkaar ki udyogon ke anukool neeti ka bhi prachaar kar rahe hain, haalaanki iske bhi kuchh aalochak hain. udyogapati aur kaarobaari Modi ko pradhaanamantri bante dekhna chaahate hain, kyonki unhein aisa mahasoos hota hai ki khaastaur se aise samay jab UPA ke shaasan mein desh mein 'Neetigat jadta' vidyamaan hai, vah ek nirnaya lene mein saksham vyakti saabit hue hain. ek mauke par ek muslim dharmaguru dvaara pesh ki gayi islaamik topi pahanane se inkaar karne ke kadam ke liye aalochna ka shikaar hue Modi ne is aarop ko khaarij karte hue kaha ki vah apne pratidvandi dvaara ki jaane waali 'Prateekon ki raajaneeti' ka anusaran naheen kareinge. Gautam buddh aur svaami vivekaanand ke jeevan aur shikshaaon se sabak lene vaale Modi ne kaafi yuvaavastha mein hi apna vaadanagar ka ghar chhod diya tha aur ek prachaarak ke taur par raashtreeya swayamsevak sangh mein shaamil ho gaye the. Kaafi kam umr mein vah apne gaanv ke railway station par, jahaan unke pitaaji ki chai ki dukaan thi, aur baad mein Ahmedabad shahar ke bas adde par chai becha karte the.