Nam Aankhon Se Modi Ne Advani Se Kiya 'Krupa Shabd Istemaal Naheen Karne Ka Aagrah

Breaking »

Nam Aankhon Se Modi Ne Advani Se Kiya 'Krupa Shabd Istemaal Naheen Karne Ka Aagrah

Nai Delhi: bhaarateeya janta party ke sansadeeya board ki baithak mein neta chune jaane ke baad Narendra Modi ne party ke varishth neta Lal Krishna Advani dvaara kahe gaye 'Krupa' shabd ka jaise hi uddharan kiya, vah bhaavuk ho gaye aur kuchh palon ke liye bolne mein asamarth rahe, jiske baad unhonne Advani se aagrah kiya ki vah 'Krupa' shabd ka prayog na karein. Narendra Modi us vakt bhaavuk ho gaye jab unhonne varishth neta Lal Krishna Advani ki baat ka javaab diya, jismein unhonne kaha tha ki unhonne (Modi) chunaav mein party ka netrutv kar krupa ki hai. Modi ne kaha, krupaya kar 'Krupa' shabd ka istemaal na karein. Ek beta apni maan par krupa naheen karta hai. Beta samarpan ke saath kaam karta hai. Main bhaajapa ko apni maan maanata hoon. isse poorv BJP sansadeeya dal ka neta chune jaane ke baad Narendra Modi ne varishth neta Lal Krishna Advani ka aabhaar jataaya. Unhonne kaha ki party ne mujhe jo bhi kaam diya, mainne use poora karne ki koshish ki. central hall mein Narendra Modi ne kaha ki 15 September se mainne apna kaam aarambh kiya. 9 May ko sirf ghosi ka kaaryakram radd karna pada. yeh is lokatantr ki taakat hai ki desh ka saamaanya naagrik yahaan par khada hai. Unka kehna tha ki is chunaav mein Bhaarat ke saamaanya naagrik ke bheetar ek oorja ka sanchaar hua hai. Modi ne kaha ki sarkaar vo ho jo gareebon ke liye soche, sunein aur usi ke liye jiye. Yeh nai sarkaar desh ke gareebon ke liye samarpit hai, yuvakon ke liye aur maan-sammaan ke liye tarasti maan-bahan ke liye yeh sarkaar samarpit hai. Modi ne kaha ki logon ke sapanon ko poora karne ke liye yeh sarkaar kaam karegi. Modi ne kaha ki main aashaavaadi vyakti hoon. Gujarat mein bhookamp aaya, vah teen saal mein uth khada hua. Aaropon ke aadhaar par niraash man ko lekar chalne ki aavashyakta naheen hai. Yeh desh jaagruk lokatantr hai. main kabhi yeh soch naheen rakhata tha ki puraani sarkaar ne kuchh naheen kiya. Desh jab se aajaad hua tab se bahut kaam achhe bhi hue. Vah sabhi sarkaarein badhaai ke paatr hain. Modi ne kaha ki 2019 mein jab mileinge, main fir apna report card doonga. Main apne liye naheen, desh ke liye jeeoonga. desh ke logon ne poora bahumat diya hai taaki vishv patal par desh ka sammaan ooncha ho. Modi ne kaha ki party ne varishth netaaon ne jab mujhe kaandhe par uthaaya tabhi main yahaan par pahunch paaya hoon. Modi ne kaha ki party aaj yahaan par hai, kyonki paanch peedhiyon ne iske liye kaam kiya hai. Yeh vijay un sabhi logon ki hai, laakhon kaaryakartaaon ki hai.

Nam Aankhon Se Modi Ne Advani Se Kiya 'Krupa Shabd Istemaal Naheen Karne Ka Aagrah https://www.angrejinews.com/pic/51134