Mubaarak Ke Khilaaf Sunavaai 11 May Ko

World » Thursday, April 18, 2013

kaahira. . Mistr ke poorv raashtrapati hosni mubaarak aur unke kaaryakaal mein aantarik maamalon ke mantri rahe habeeb al-adali ke khilaaf pradarshanakaariyon ki hatya se sambandhit ek maamale mein 11 May ko fir se sunavaai hogi. Samaachaar agency sinhuaa ke anusaar, poorv raashtrapati ke saath-saath unke do beton- gamaal aur ala- tatha bhagode udyogapati husain salem ke khilaaf bhi vitteeya bhrashtaachaar tatha munaafaakhori ke aarop mein fir se sunavaai hogi. Mukadame ki sunavaai 13 April ko hi honi thi, lekin ise sthagit kar diya gaya, kyonki maamale ki sunavaai karne vaale nyaayaadheesh ne swayam ko sunavaai se alag kar liya. Iske baad yah maamala appeali adaalat mein pahuncha. Mubaarak ko June 2012 mein pradarshanakaariyon ko maravaane ke maamale mein aajeevan kaaraavaas ki saja sunaai gayi thi. Lekin, unhonne is faisale ko chunauti di thi, jise appeali adaalat ne sveekaar karte hue mubaarak ke khilaaf fir se sunavaai ke aadesh diye the. Kaahira ki appeali adaalat ne somvaar ko is maamale mein mubaarak ko parol diya tha, lekin anya maamalon mein lambit jaanch ko dekhte hue unhein hiraasat mein rakhane ka nirdesh diya tha.