Modi Ki Kaat Ke Liye Aae Vaaghela

India »

Modi Ki Kaat Ke Liye Aae Vaaghela

manjari chaturvedi. Nai Delhi Congress ne Gujarat ke mukhyamantri Narendra Modi ke Gujarat ki 'Vikaas gaatha' ke prachaar ki kaat karne ki yojana banaai hai. Iske tahat Gujarat Congress ke senior neta aur neta pratipaksh shankar Singh vaaghela Budhvaar ko Delhi mein naishanal media ko sambodhit kareinge. Congress sootron ke mutaabik, vaaghela Narendra Modi ke vikaas ke daavon ki pol kholeinge. Gaurtalab hai ki Narendra Modi in dinon desh bhar mein ghoom-ghoom kar apne Gujarat vikaas ke apne model ka samaan baandhane mein lage hain. Vah apni sarkaar ki kaamayaabi ginaane ke liye in dinon har tarah ke manch par ja rahe hain. Unki is kavaayad ko aagaami aam chunaav mein pradhaanamantri pad ke liye unki daavedaari ke taur par dekha ja raha hai. Aise mein Modi ke daavon ko khaarij karne ke liye Congress ne Gujarat ke poorv CM aur party ke senior neta shankar Singh vaaghela ko saamane utaarane ka faisala kiya hai. Party ke ek bade neta ke mutaabik, Gujarat ke vikaas ko lekar bade-bade daave kiye ja rahe hain, jabki jameeni star par vahaan ki janta tamaam dikkaton se joojh rahi hai. Gujarat ko jis tarah se number van bataaya ja raha hai, aisi koi baat naheen hai. Hakeekat hai ki vahaan logon ko peene ka paani naheen hai, raajya mein kaanoon vyavastha behad kharaab hai, sinchaai ki vyavastha naheen hai, nivesh aur udyogon ko bura haal hai. Isi sab ko dekhte hue party ne tathaakathit Gujarat vikaas ki asaliyt desh ko bataane ki yoejana banaai hai. Gaurtalab hai ki Modi ki asaliyt saamane laane ke liye vaaghela ko utaarane ke peechhe bhi Congress ki sochi samajhi rananeeti hai. Daraasal, kisi samay mein Modi vaaghela ke kaafi kareebi huaa karte the. Gujarat BJP mein Modi aur vaaghela ki jodi kaafi aham maani jaati thi. Us samay is jodi ko chandragupt aur chaanakya ka naam diya jaata tha. Lekin samay ke saath donon ke raaste alag ho gaye. Aise mein Congress ne Modi ke daavon ko kaatne ke jimmedaari unheen vaaghela ko saunpi hai, jo Modi ki rag-rag se vaakif rahe hain.

Modi Ki Kaat Ke Liye Aae Vaaghela https://www.angrejinews.com/pic/5819