Manmohan Singh Fir Baneinge Pradhaanamantri Pad Ke Pratyaashi

Breaking » Tuesday, April 2, 2013

Nai Delhi . . Congress netrutv ki or se pehli baar yah sanket aaya hai ki shaayad agali baar bhi Dr. Manmohan Singh ko hi UPA ki taraf se pradhaanamantri pad ka daavedaar banaakar pesh kiya jaae. Yah sanket Congress mahaasachiv janaardan Dwivedi ke us bayaan se nikla hai jismein unhonne Congress adhyaksh soniya Gandhi aur pradhaanamantri Manmohan Singh ke rishte ki taareef karte hue yahaan tak kah diya ki yah rishta aage bhi jaari rahana chaahiye. Mangalvaar ko mediakarmiyon se baatcheet ke dauraan janaardan Dwivedi ne soniya aur Manmohan ke beech taalamel aur vishvaas ki taareef mein koi kor-kasar baaki naheen rakhi. Unhonne kaha ki aisa rishta pehle kabhi naheen dekha. Unhonne kaha ki kaheen aur is tarah ka rishta naheen dikhta hai. Vah yaheen naheen ruke, unhonne yah bhi kah diya ki yah rishta aage bhi aise hi bana rahe to bahut achha hoga. Janaardan Dwivedi ke is bayaan ka saaf matlab yah hai ki vah aage bhi Congress adhyaksh aur pradhaanamantri ke roop mein in donon ko hi dekhna chaahate hain. Aisa tabhi ho sakta hai jab Congress 2014 ke aam chunaavon mein bhi Manmohan Singh ko hi pradhaanamantri pad ka pratyaashi banaae. Janaardan Dwivedi ka yah bayaan isliye bhi aham hai kyonki kuchh hi dinon pehle ek anya mahaasachiv digvijya Singh ne saaf kaha tha ki Rahul Gandhi pradhaanamantri banana chaahate hain. Unhonne kaha ki koi neta khud apne munh se yah naheen kehta ki vah PM banana chaahata hai. Digvijya Singh ko Rahul Gandhi ka kareebi maana jaata hai. Aise mein unke bayaan ko kisi saamaanya neta ka bayaan naheen maana ja sakta. Khaas baat yah ki Rahul Gandhi ki taraf se unke us bayaan ka khandan bhi naheen aaya, na hi kisi tarah ka asantosh ya naaraajagi unhonne us bayaan par jaari ki. Iske baavajood janaardan Dwivedi ne saarvajanik taur par apni yah ichha jataai ki vah soniya aur Manmohan ki jugalabandi jaari rakhana chaahate hain. Jaankaaron bataate hain ki top leadership ki pratyaksh ya paroksh ijaajat ke bagair aisa naheen ho sakta hai. Yoon bhi agar unhonne yah bayaan aalaakamaan ki ichha ke khilaaf di hai to jaldi hi unhein aur sabko iska ehsaas ho jaaega.