Mahila Vishwacup England Ki Dakshin Africa Par Badi Jeet

Cricket » Sunday, February 10, 2013

Cuttack: Madhyam gati ki geindabaaj aanya shrubasobe ne apne career ki sarvashreshth geindabaaji ki, jisse England ne ICC mahila vishwacup ke super six match mein dakshin Africa ko 243 geind shesh rahate hue saat wicket se hara diya. Pichhle match mein Australia se do run se haarne vaale England ko final ki daud mein bane rahane ke liye bade antar se jeet ki darkaar thi aur vah ismein safal raha. Dakshin Africa ki team pehle ballebaaji ka nyota milne par 29.3 over mein 77 run par dher ho gayi. England ne keval 9.3 over mein teen wicket par 81 run banaakar super six mein apni pehli jeet darj ki. England ki is jeet ki naayika shrubasobe rahi, jinhonne 17 run dekar paanch wicket liye. Unhein denili vaat ka bhi achha sahayog mila. Vaat ne nau geind par saat run dekar teen wicket haasil kiye. Dakshin Africa ki chaar ballebaaj denavaan neekark (17), shameem ismaail (16), maarijen kaip (13) aur saandre fritj (10) hi dohare ank mein pahunch paai. England ki bhi 10 wicket se jeet darj karne ki ichha poori naheen ho paai, lekin eren brindal ne 16 geind par chhah chaukon ki madad se naabaad 28 aur Lydia greenway ne 19 geind par paanch chaukon ki madad se naabaad 25 run banaakar team ko 10 over ke andar jeet dila di.