Maharashtra Karajaat Sheltar Hom Mein Bachchon Ka Yaun Shoshan Karne Ke Aarop Mein Do Giraftaar

India » Thursday, May 29, 2014

Mumbai: Maharashtra ke raayagadh jile ke karajaat ke ek baal aashray gruh mein paanch bachchon ke saath kathit taur par yaun shoshan ke liye do adhikaariyon ko giraftaar kiya gaya. police ne bataaya ki kuchh bachchon ke abhibhaavakon ne aashram mein yaun shoshan ki shikaayat ki, jiske aadhaar par police ne chandraprabha trast ke pramukh ajeet daabholakar aur prabandhak lalita tonde ko mangalvaar ko giraftaar kiya. daabholakar aur tonde raayagadh ke karajaat taaluk mein aadivaasi aur gareeb bachchon ke liye aashram chalaate hain. Yahaan 4 se 15 saal ki umr ke kareeb 32 bachche rah rahe hain. karajaat police ne praarambhik jaanch mein pata lagaaya ki donon aaropiyon ne 11 se 15 saal umr ki ladkiyon aur ek ladke ka kathit taur par yaun shoshan kiya. karajaat police thaane ke sahaayak police nireekshak SM jaadhav ne bataaya ki donon aaropi aashray gruh ke bachchon se jabaradasti apne saamane yaun krutya karaate the aur aisa na karne par apna malamootr khilaane ki dhamaki dete the. in cheejon ka khulaasa tab hua jab aashram mein rahane vaale ek bachche ne apni maan ko is baare mein bataaya. police ne donon aaropiyon ko giraftaar kar liya aur unhein 27 May ko raayagadh jila satr nyaayaalaya mein pesh kiya, jahaan se unhein 5 June tak ke liye police hiraasat mein bhej diya gaya. police ne bataaya ki donon aaropiyon ke khilaaf IPC ki dhaara 377 (apraakrutik yaunaachaar), 354, 509, 342 aur yaun aparaadh baal sanrakshan adhiniyam, 2012 ki dhaara 3, 5 aur 7 ke tahat maamala darj kiya gaya hai.