Lok Lekha Samiti Ki Sifaarish, Kalmadi Par Karo Maamala Darj
Breaking » Wednesday, April 17, 2013
pramukh samvaadadaata. . Mumbai bhaarateeya olympic asosiyeshan ke poorv adhyaksh suresh Kalmadi par Maharashtra ki lok lekha samiti ne faujadaari ka maamala darj karne ka aadesh diya hai. Samiti ne san 2008 mein Pune mein aayojit raashtramandal yuva khelon mein bhaari paimaane par aniymittaaen paai hain. Yahaan tak ki kharch karne ke liye aapaat kosh se fund nikaala gaya. Maharashtra lok lekha samiti ke adhyaksh Girish baapat ne Budhvaar ko vidhaanasabha mein 12veen report rakhi. Unhonne kaha ki aayojan samiti ke adhyaksh Kalmadi aur sadasya sachiv lalit bhanot ne kharch karne ke liye 32.95 karod rupaye atirikt raashi maangi thi aur vah raashi aapaat kosh se diya gaya tha. Us raashi mein 25.12 karod rupaye khel va yuva sevaaon ke nideshaalaya ne aayojan samiti ke paas bhej diya, jabki baaki ki raashi 7.93 karod rupaye mein 4.36 karod rupaye hi kharch kiye gaye. Baaki 3.47 karod rupaye jama karaane ki bajaay us raashi ko gairkaanooni roop se apne paas hi rakha liya. Bill-vil ka pata naheen: Baapat Maharashtra lok lekha samiti ke adhyaksh Girish baapat ne patrakaaron se baatcheet karte hue kaha ki khel ke aayojan mein aarthik morche par bahut paimaane par ghotaale hue hai. Raashtramandal yuva khelon ka aayojan 12 se 18 October ke beech Pune mein aayojit kiya gaya tha. Iske antargat pratiyogita ke liye sthal aur saadhan muhaiya par 427.77 karod rupaye, aadhaar bhoomi suvidhaaon par 7.46 karod rupaye, suraksha vyavastha par 18.03 karod rupaye kharch karne ka praavadhaan kiya gaya. Kul 1189.89 karod rupaye kharch karne ke liye bajat mein rakha gaya tha. Is rakam mein se 1165.26 karod rupaye kharch kiye gaye, kintu kharch ki gayi rakam ke hisaab kitaab mein samiti ne bahut saari gadbadiyaan paain. Girish baapat ne kaha ki jaanch ke dauraan humne aniyamitataon ki bharamaar paai. Kareeb 25.12 karod rupaye ka hisaab sirf ek pej mein diya gaya, jise dekhkar samiti ke sadasya bhi hataprabh rah gaye. Khel ke upakaranon ki khareed se lekar khilaadiyon ko suvidha muhaiya karaane tak sabhi tarah ki khareed par samiti ne ungali uthaai hai. Samiti ke pramukh baapat ne bataaya ki padtaal ke dauraan unhein aisa prateet huaa bahut kuchh chhipaaya gaya hai. Kaagajaat mangaae gaye, lekin bahut saare vibhaag ne kaagajaat hi muhaiya naheen karaaya.