Laddakh Mein Cheeni Ghuspaith Ka Maamala Sulajhane Ki Ummeed

Breaking » Wednesday, April 24, 2013

Nai Delhi. . Laddakh mein cheeni sainikon ki ghuspaith ke nau din baad ab maamala sulajhane ki ummeedein banti dikhaai day rahi hain. Kendra sarkaar ki or se is maamale par peiching aur cheingadoo (sichuyaan ki rajdhani) ko 'Mesej' bheje gaye hain. Haalaanki donon deshon ke sainya commanderon ki mangalvaar ko hui doosari baithak benateeja rahi aur cheen ise ghuspaith naheen maanane ke apne puraane ravaiye par kaayam raha. Mangalvaar ko Bhaarat ki or se cheen ko daulat beg oldi sector mein yathaasthiti banaae rakhane ke liye kaha gaya hai. Udhar cheeni videsh mantraalaya ne ek baar fir yahi kaha ki uske sainikon ne koi ullanghan naheen kiya hai aur saath hi yah bhi kaha ki 'Donon hi desh is maamale par aapas mein achha samvaad sthaapit kiye hue hain. 'Donon hi deshon ki or se vartamaan haalaaton par sanyam baratne ki koshish ki ja rahi hai taaki sambandhon par asar na pade. Bata dein ki pichhle nau dinon se Laddakh ke daulat beg oldi ke najadeek cheeni sainik bhaarateeya had mein kareeb 10 kimi andar aakar ek teint chauki banaakar jame hain. Sootron ke mutaabik, cheeni raajadoot ne dohara rahe hain ki cheen ne vaastavik niyantran rekha ka ullanghan naheen kiya hai. Cheen ke is ravaiye ko darakinaar karte hue Bhaarat ne apratyaksh shabdon mein chetaavani di ki vah ummeed karta hai ki masale ka shaantipoorn tareeke se hal nikal aaega. Pravakta ne kaha ki ghuspaith vaastavik niyantran rekha ki alag-alag avadhaarana ki vajah se ho sakti hai. Haalaanki, unhonne yaad dilaaya ki aisi haalat mein donon desh sanyam baratate hue aapasi baatcheet se iska hal nikaaleinge aur kisi jhadap mein naheen ulajheinge. Videsh mantraalaya ke pravakta Sayyed Akbaruddin ne 2005 ke protokaul ke praavadhaanon ka havaala dete hue kaha ki tay prakriya ke tahat aamne-saamane ki sthiti mein donon paksh sanyam dikhaaenge aur tanaav na badhe ise sunishchit karne ke liye sabhi upaaya kareinge. Isi protokaul ke tahat 16 April ko kootaneetik star par baatcheet ke baad 48 ghante ke bheetar donon deshon ke beech 18 April ki subah flaig meeting bulaai gayi. Haalaanki, iska koi nateeja naheen nikal paaya. Ilaake mein Bhaarat aur cheen ke sainikon ke aamne-saamane hone ki sthiti ki pushti karte hue videsh mantraalaya ne kaha hai ki vaastavik niyantran rekha par donon desh yathaasthiti banaae rakhein. Is maamale par sootron ke mutaabik, Bhaarat ki or se briged commander aur cheen ke senior Colonel ke beech chushool ke najadeek kareeb paanch ghante chali flaig meeting mein cheeni teint hataane ki koi soorat naheen ban paai. Bhaarat ne cheen ko seema par 15 April se pehle ki sthiti mein lautane ke liye kaha hai. Behad foonk-foonkakar kadam rakh rahe bhaarateeya kheme ne aur flaig meeting ka man banaaya hai. Isse pehle Akbaruddin ne kaha ki 15 April ko ghuspaith ka pata chala aur 16 April ki subah mantraalaya ke poorvi Asia maamalon ke sanyukt sachiv Gautam bambaavaale ne cheeni videsh mantraalaya mein apne samakaksh se sampark kiya. Iske agale din yahaan videsh sachiv ranjan mathaai ne cheen ke raajadoot vei vei ko bulaakar kaha ki vah apne sainikon ko pehle ki tainaati vaale jagah par vaapas bulaaen.