Kyon Tooti Manmohan Aur Soniya Ki Jugalabandi

India »

Kyon Tooti Manmohan Aur Soniya Ki Jugalabandi

Lalit vats nai Delhi. . Pavan bansal aur ashvini Kumar ke isteefon ke saath hi Congress ke ek dhade ne yah sandesh diya ki pradhaanamantri Dr. Manmohan Singh ne donon isteefe lene mein anaavashyak deri ki, party adhyaksh soniya Gandhi to shuroo se donon mantriyon ki vidaai chaahati theen. Kaha to yahaan tak ja raha hai ki pichhla chunaav Manmohan ke naam par ladne waali Congress mein hi ab unka kad chhota karne ki koshish ho rahi hai. Yaani UPA-too ki sabhi viflataaen ek tarah se Dr. Singh par daal kar agale chunaav aur Rahul Gandhi ke liye stage taiyaar ki ja rahi hai. Is sabke beech lakh take ka savaal hai ki ki koyala blauk aavantan mein Dr. Manmohan Singh ne kya koi niji faayda uthaaya? Bansal ke bhaanje ki giraftaari se pehle ashvini Kumar dvaara CBI ki jaanch report dekhne aur badlaav karaane ka maamala bhi garam ho chuka tha. Donon hi maamalon mein Congress kor group ne intajaar karne ka faisala kiya. Sansad ke andar bhi Congress netaaon ke tevar yahi the ki isteefe kis liye? Kya vajah thi? Ashvini Kumar ke maamale mein to kah sakte hain ki Supreme court mein agali sunavaai ka intajaar tha, lekin bansal ke maamale mein kya tha? Kya bansal ne PM aur Congress leadership ko rel rishvatakaand mein apne baare mein jo safaai di, vah poori bharose laayak thi? Yadi itni bharose laayak thi, to kal shukravaar aate-aate kya ho gaya? Yadi leadership ko gumaraah karne ki koshish thi, to pehle hi din sahi rukh kyon naheen apnaaya gaya? Kam se kam bayaan aur sansad mein kaaryavaahi ke lihaaj se to saavadhaani ho sakti thi? Is tarah ke kai savaal hain, jo Congress ke andar bhi charcha mein hain. Ek saptaah ke dauraan Congress ka kor group kai baar mila aur har baar ek naya rukh dikha? Usi beech yah sanket bhi diye gaye ki PM Dr. Singh apne kareebi aur Chandigarh nivaasi donon mantriyon ko bacha rahe hain ya naram hain. Party cheef soniya Gandhi aur PM ke beech matabhedon ki baat bhi hava mein tairaai gayi. Aakhir mein isteefe tab liye gaye, jab soniya Gandhi PM se shukravaar ko mileen. Is sabamein soniya Gandhi ki imej to beshak ban gayi, lekin raajaneetik jaankaaron ke mutaabik bedaag chhavi ke maalik Dr. Singh ki imej ko kaafi jhatka laga hai. Kya yah bas anajaane mein huaa hai? Jo bhi ho, jaankaaron ke mutaabik Dr. Singh par UPA-too ki buraaiyon ki jimmedaari daal kar yadi yah Rahul Gandhi ke liye aag ki stage set karne ki koshish hai, to ismein ek bada pech bhi hai. Kya Congress khud UPA-too ki kamiyon auair viflataaon ki jimmedaari se bach sakti hai? Kya apne mistar clean PM ke naam ko daanv par lagaane ka bojh samoochi Congress aur Rahul par naheen padega? Kya yah kaha ja sakega ki 2006 se 2008 tak koyala mantraalaya ka bhi kaam dekh rahe Dr. Singh ko khadaan aavantan mein koi niji laabh huaa hoga? Yadi naheen, to vah laabh kise huaa, kiske kehne par aavantan hue, yah bhi savaal raheinge? Haalaanki, aavantan ki samvaidhaanik aur prashaasanik jimmedaari to sambaddh mantri ki hi bataai jaati hai, lekin asal faayda kise huaa, yah jaanch se pata chalta hai. Jaanch CBI kar rahi hai. Party ka savaal hai ki ashvini Kumar ne kise bachaane ke liye CBI report mein badlaav karaae? Iska javaab Congress ki taraf se bhi aaj shaam tak aa sakta hai. Party hamesha ki tarah PM ke saath khadi najar aaegi. Lekin jaankaaron ke mutaabik koyala aur rel rishvat, donon hi maamalon mein abhi kai chaiptar baaki lagte hain. Koyale ki aanch yadi PM ki taraf badhaai jaati hai, to vah jaaegi doosari taraf bhi.

Kyon Tooti Manmohan Aur Soniya Ki Jugalabandi https://www.angrejinews.com/pic/8352