Kerala Mein Modi Ko Math Mein Bulaane Par Bhadka Vaam Morcha
Breaking » Monday, April 22, 2013
Tiruanantapuram. . Kerala ke shram mantri shiboo baby John ke Gujarat ke mukhyamantri Narendra Modi se milne ko lekar hue vivaad ke baad ab ek doosare maamale mein vaam morcha ne ek kaaryakram mein Modi ko mukhya atithi ke roop mein bulaane ke liye varakala sthit shri Narayan math ke khilaaf morcha khol diya hai. Jahaan varishth vaamapanthi neta aur raajya ke poorv mukhyamantri VS achyutaanandan pehle hi samaaroh ke bahishkaar ki baat kah chuke hain, vaheen kal CPM ke raajya sachiv pinraai vijyan ne Modi ko nyota dene ke liye math ki aalochna ki. Vijyan ne kaha ki sannyaasiyon ko 'Maanavata ke liye ek jaati, ek dharm aur ek ishvar' ka sandesh dene vaale sant-sudhaarak shri Narayan guru dvaara sthaapit aadhyaatm kendra mein Modi ko aamantrit naheen karna chaahiye tha. Vijyan ne pantanamatitta mein ek baithak mein kaha, 'Shivgiri dharmanirpeksh adhyaatm ka prateek hai. Modi ko bulaane se ise hindu math mein badalne ki koshish ke roop mein dekha ja sakta hai. ' math ke adhikaariyon ne haalaanki aalochanaaon ko khaarij karte hue kaha ki aashram ke darvaaje sabhi ke liye khule hain aur yah vivaad anuchit hai. Shri Narayan dharm sangam trast ke adhyaksh svaami ritanbharaanand ne kaha, 'Shivgiri math raajaneeti naheen karta aur ham sabhi ka svaagat karne ki parampara ka paalan karte hain. ' unhonne kaha ki math ne UPA adhyaksh soniya Gandhi aur Congress ke upaadhyaksh Rahul Gandhi ko bhi nyota bheja tha, lekin unhonne koi javaab naheen diya. Tiruanantapuram se 30 kilometer ki doori par sthit shivgiri math shri Narayan guru ke bhakton ka ek pavitra teerth sthal hai. Math ke parisar mein 'Vidya devata' ki moorti sthaapit ki gayi hai. Math mein 24 April ko iski sthaapana se juda samaaroh manaaya jaaega. Haal mein shram mantri aur aaraesapi (bi) ke neta shiboo baby John Modi se mulaakaat karne ko lekar aalochanaaon ke ghere mein aa gaye the. Congress ne John ki kadi aalochna ki thi aur mukhyamantri omaan chaandi ne unase spashteekaran maanga tha.