Kendra Ne Doharaai Aatankavirodhi Pratibaddhata, Bhaajapa Ne Uthaaya Savaal

Breaking »

Kendra Ne Doharaai Aatankavirodhi Pratibaddhata, Bhaajapa Ne Uthaaya Savaal

Nai Delhi: Kendra sarkaar ne shukravaar ko kaha ki vah aatankvaad se ladne ke liye pratibaddh hai, lekin sarkaar ke javaab se asantusht mukhya vipakshi party bhaarateeya janta party (bhaajapa) ne khufiya soochana rahane ke baavajood Hyderabad mein aatankvaadi hamla hone par kendra sarkaar ki bhartsana ki. Hamle mein marne vaalon ki sankhya shukravaar ko 16 ho gayi jabki 117 ghaayalon ka ilaaj chal raha hai. Keindreeya gruhamantri susheel Kumar shinde ne shukravaar ko Loksabha mein diye gaye apne likhit bayaan mein kaha, "Sarkaar aise kaayaraana aatankvaadi hamlon se mukaabala karne ke liye pratibaddh hai aur visfot ke saajishkartaaon aur sootradhaaron ko pakadne va unhein kaanoon ke mutaabik saja dilaane ke liye har sambhav kadam uthaaegi. " theek yahi bayaan unhonne Rajyasabha mein bhi diya. Sansad ke donon sadanon mein bhaajapa ki teekhi aalochna ka saamana karte hue shinde ne aatankvaad virodhi raashtreeya kendra (enaseeteesi) ke roop mein sarvochch sanstha banaane ke prastaav ki vakaalat ki. Is prastaav par kuchh raajyon ne unke adhikaar kshetr mein dakhal kehkar virodh jataaya tha jiske baad se yah prastaav thande baste mein hai. Rajyasabha mein shinde ne kaha, "Visfot ne enaseeteesi ki darkaar ko saabit kiya hai. Jab ham ise laana chaahate hain, har koi kehta hai yah raajyon ke khilaaf hai. Ham enaseeteesi laane ke liye taiyaar hain, ham is par charcha kar sakte hain. " unhonne kaha ki raashtreeya khufiya grid aatankvaad ke khataron se nipatne mein pehle se hi madad kar raha hai. Shinde ne desh mein aatankvaad se nipatne mein sabhi paartiyon se madad karne ki gujaarish ki. Bhaajapa ne keindreeya gruhamantri se sakriyta dikhaane ke liye kehte hue kaha ki is khatre se nipatne mein sarkaar aur vipaksh ki ekajutata jaroori hai. Vipaksh ki neta Sushma Swaraj ne Loksabha mein shinde ke bayaan mein is ullekh par ki hamle ki khufiya soochana thi aur iske baare mein Andhra pradesh ko sachet kiya gaya tha, par kaha, "Aatankvaad se ladaai mein aap pratibaddhata dikhaaen. Kya kendra sarkaar ki bhoomika sirf raajyon ko sachet karne tak hai ya fir aatankvaadi gatividhi rokane ki bhi hai? " unhonne kaha, "Yadi aatankvaadi hamle ki khufiya soochana upalabdh thi to sarkaar ki javaabadehi aur badh jaati hai. . Kendra aur raajya sarkaarein kar kya rahi theen. " Bhaajapa neta ne kaha ki kendra sarkaar ne Bengaluru aur Mumbai ko bhi aatankvaadi hamle ke prati sachet kiya tha. Unhonne yah jaanana chaaha ki in donon shaharon ko surakshit banaane ke liye kya kadam uthaae gaye. Unhonne yah jaanana chaaha ki Hyderabad visfot Afzal guru ki faansi se juda to naheen hai aur savaal kiya ki sarkaar ne sansad par hamle ke doshi ko fande par latakaane mein nau varsh ka samay kyon lagaaya. Vipaksh ki neta ne yah bhi jaanana chaaha ki kya ye visfot Hyderabad mein majalis-A-ettehaadul muslimeen (MIM) netaaon ke haal ke bhadkaaoo bhaashan se sambaddh to naheen hain? Rajyasabha mein pratipaksh ke neta arun jetali ne kaha, "Bajat satr ke pehle din ka durbhaagya yah hai ki ise yah yaad dilaane ke liye chuna gaya ki Bhaarat aatanki radaar par sabse sheersh par hai. " unhonne kaha, "Sarkaar yah sunishchit kare ki Hyderabad visfot Bhaarat mein is prakaar ki antim ghatna hai. " Vipaksh ke chautarafa hamlon se ghire shinde ne sansad ko bataaya ki unhonne aaj savere Hyderabad ka daura kiya aur Andhra pradesh ke raajyapaal ESL narasimhan evam mukhyamantri N. Kiran Kumar Reddy ke alaava police adhikaariyon ke saath milkar sthiti ki sameeksha ki. Ve aspataalon mein bharti ghaayalon ka haalachaal lene bhi gaye the. Unhonne kaha ki keindreeya gruh savich aar. Ke. Singh aur raashtreeya jaanch agency (NIA) ke mahaanideshak S. Si. Sinha ne Hyderabad ka daura kiya aur raajyapaal, mukhyamantri aur raajya ke anya varishth adhikaariyon ke saath milkar sameeksha ki. Unhonne kaha ki Andhra pradesh police ke saath milkar NIA is hamle ki jaanch karegi. Unhonne kaha ki praarambhik jaanch mein yah khulaasa huaa hai ki donon dhamaakon mein IED ka istemaal kiya gaya tha jo cycle par rakhe gaye the. Pradhaanamantri Manmohan Singh ne mrutakon ke parijanon ko do-do lakh rupaye ki sahaayata raashi dene ki ghoshana ki hai. Andhra pradesh sarkaar ne mrutakon ke parijanon ko chhah lakh rupaye tatha ghaayalon ko 50,000 rupaye se lekar ek lakh rupaye tak dene ki ghoshana ki hai. Shinde ne kaha, "Sthiti ab niyantran mein hai. "

Kendra Ne Doharaai Aatankavirodhi Pratibaddhata, Bhaajapa Ne Uthaaya Savaal https://www.angrejinews.com/pic/2607