IPL-6 Royal Challengers Ke Saamane 153 Ranon Ka Lakshya

Cricket »

IPL-6 Royal Challengers Ke Saamane 153 Ranon Ka Lakshya

Bengaluru. . Delhi Daredevils team ne mangalvaar ko M chinnaasvaami stadium mein jaari Indian Premier league (IPL) ke chhathe sanskaran ke 21vein mukaabale mein royal Challengers Bengaluru ke saamane 153 ranon ka lakshya rakha hai. Toss haarakar pehle ballebaaji kar rahi Daredevils team ne nirdhaarit 20 overon mein paanch wicket par 152 run banaae. Mehmaan team ke liye kedaar jaadhav ne sabse adhik naabaad 29 run banaae. Irfan pathaan 19 ranon par naabaad laute. Royal Challengers ki or se jayadev unaadakat ne do wicket chatakaae. Salaami ballebaaj Virendra Sehwag (25) aur David Warner (15) ne pehle wicket ke liye 34 geindon par 43 run jodkar achhi shuruaat karaai. Is shuruaat ke dam par Delhi ki team bada score khada kar sakti thi. Iske liye haalaanki vah kaafi had tak Sehwag aur Warner par hi nirbhar thi lekin Warner vinaya Kumar ki geind par 13 geindon mein 15 run banaakar out hue. Vinaya ne apni hi geind par Warner ka shaanadaar catch pakada. Warner abhi pavilion lautakar susta hi rahe the ki agale hi over mein 43 ke hi kul yog par hi Delhi ko achhi laya mein dikh rahe Sehwag ke roop mein doosra jhatka laga. Sehwag ne 23 geindon ka saamana kiya aur 25 run banaae. Is dauraan unhonne chaar chauke bhi jade. Sehwag ko endroo maikdonald ne is league ki apni pehli hi geind par kaptaan viraat Kohli ke haathon catch kara diya. Ek ke baad ek do bade jhatakon se sahami Delhi ko ubaraane ki jimmedaari kaptaan maahela jayavarddhane (28) par aa gayi. Doosare chhor par yuva ballebaaj Manpreet juneja (17) the. In donon ne milkar score ko 73 tak pahunchaaya lekin is score par unaadakat ne juneja ko out karke Delhi ki behtar score paane ki chaah ko jhatka diya. Ben rorer (14) ne wicket par aate hi aakraamak tevar dikhaae aur 14 geindon par do chauke lagaae lekin unaadakat ne unhein bhi chalta karke apni team ka kaam aasaan kiya. Jayavarddhane lagaataar apni team ko achha yog dilaane ke prayaas mein jute rahe. Vah achhi laya mein dikh rahe the lekin 122 ranon ke kul yog par naun striker end par rahate hue vah durbhaagyapoorn dhang se run out ho gaye. Jayavarddhane ne 31 geindon par do chauke lagaae. Iske baad pathaan aur jaadhav ne chhathe wicket ke liye 12 geindon par 30 ranon ki saajhedaari ki. Jaadhav ne 16 gaindo par do chauke aur ek chhakka lagaaya jabki pathaan ne aath geindon par do chauke aur ek chhakka udaaya. Delhi ki team apne pichhle chaar match haar chuki hai royal Challengers ek aur jeet haasil karte hue ank taalika mein sheersh sthaan haasil karna chaahegi. Royal Challengers ne tournament mein ab tak paanch match khele hain. Teen jeet aur do haar ke saath vah ank taalika mein doosare sthaan par maujood hai.

IPL-6 Royal Challengers Ke Saamane 153 Ranon Ka Lakshya https://www.angrejinews.com/pic/5763