Hom Ministri Ke 'Sootron Se Khafa Hai NIA

India »

Hom Ministri Ke 'Sootron Se Khafa Hai NIA

vishesh samvaadadaata. Nai Delhi hijbul aatanki hone ke aaropi liyaakat shaah ko lekar gruh mantraalaya ke 'Kathit sootron' dvaara media ko di ja rahi jaankaari se raashtreeya jaanch agency (NIA) ke aala afsar khaase naaraaj hain. NIA afsaron ke mutaabik, jis tarah yah prachaarit kiya ja raha hai ki NIA liyaakat ke khilaaf 'Aatank' se jude aaropon par jor naheen degi aur usaki jamaanat mein madad karegi, isse agency ki imej kharaab ho rahi hai. NIA ke ek senior adhikaari ka kehna hai ki is maamale mein jaanch ke silsile mein ek team filhaal Kashmir mein hai. Jaanch chaaloo rahane ke dauraan hi yah kehna bebuniyaad hai ki NIA liyaakat shaah ki rihaai mein madad karegi. Agar Delhi police ki or se liyaakat par lagaae gaye aarop sach paae gaye to NIA kaanoon ke mutaabik hi kaam karegi. Adhikaari ne yah bhi maana ki liyaakat ka maamala NIA ko naheen saunpa jaana chaahiye tha. Agar sarkaar ko Delhi police ki kaarravaai par shak tha to use usaki hi kisi doosari ikaai se jaanch karaani chaahiye thi. Gaurtalab hai ki maamale ki jaanch NIA ko milne ke baad se hi media mein gruh mantraalaya ke sootron ke havaale se yah khabarein aa rahi hain ki NIA liyaakat ke khilaaf aatankvaadi hone jaise gambhir aaropon par jor naheen degi aur usaki jamaanat ka virodh naheen karegi. Isi ke kaaran NIA afsar naakhush hain. Kya hai maamala? Delhi police ne Nepal ke raaste Bhaarat aa rahe liyaakat shaah ki giraftaari ke baad rajdhani ke ek guest house se badi maatra mein hathiyaar aur gola baarood baraamad kiye the. Police ka daava tha ki liyaakat holi se pehle Delhi mein dhamaake karne ki firaak mein tha. Usane yah giraftaari apne 'Sootron' ki soochana par ki thi. Haalaanki, liyaakat ke Kashmir mein rah rahe parijanon ne daava kiya tha ki vah aatmasamarpan karne ke liye Bhaarat laut raha tha. Jammu-Kashmir ke mukhyamantri umar abdulla ne bhi is mudde ko uthaaya tha. Baad mein vivaad badhta dekh gruh mantraalaya ne is maamale ki jaanch NIA ko saunp di thi.

Hom Ministri Ke 'Sootron Se Khafa Hai NIA https://www.angrejinews.com/pic/5420