Hockey World League Bhaarat Ka Apekshit Aagaaj, Fiji Ko 16-0 Se Haraaya

Breaking » Monday, February 18, 2013

Nai Delhi: Kad aur pratishtha mein kaafi aage bhaarateeya team ne somvaar ko major dhyaanachand national stadium mein shuroo hue hero FIH hockey world league round-2 tournament ke purush varg ke apne pehle round robin mukaabale mein fiji ko 16-0 se hara diya. Bhaarateeya team madhyaantar tak 7-0 se aage thi. Is match se teen ank haasil karke Bhaarat chhah teemon ki taalika mein pehle sthaan par pahunch gaya hai. Bhaarat ke liye pehla gol VR raghunaath ne chauthe minute mein penalty corner se kiya. Iske baad paanchavein minute mein rupindar paal Singh ne ek aur penalty corner ko gol mein tabdeel kiya. Raghunaath ne 11vein minute mein haasil ek aur penalty corner par safalta haasil karte hue team ko 3-0 se aage kar diya. Iske saat minute baad nitin thimmaiya ne ek shaanadaar field gol ki madad se Bhaarat ko 4-0 se aage kar diya. Bhaarat ka paanchavaan gol penalty corner ke maadhyam se huaa aur ise karne ka shreya gurajindar Singh ko mila. Daanish mujtaba ne 28vein minute mein ek field ke maadhyam se score Bhaarat ke paksh mein 6-0 kar diya aur fir 35vein minute mein rupindar ne penalty corner ko gol mein badalkar score ko 7-0 kar diya. Madhyaantar tak yahi score raha. Madhyaantar ke baad 38vein minute mein daanish ne ek aur field gol kiya aur score ko 8-0 kar diya. Iske teen minute baad raghunaath ne penalty corner ko gol mein tabdeel kar Bhaarat ko 9-0 se aage kar diya. Bhaarat ke liye 46vein minute mein kothaajeet Singh ne ek shaanadaar field gol kiya aur score 10-0 ho gaya. Iske baad 50vein minute mein Manpreet Singh, 51vein minute mein malaak Singh, 53vein minute mein chingalenasaana Singh, 55vein minute mein dharmaveer Singh, 59vein minute mein daanish aur 63vein minute mein malaak ne field gol karke Bhaarat ko kad ke mutaabik prabhaavashaali jeet dilaai. Hockey world league round-2 mein Bhaarat ke alaava Bangladesh, omaan, cheen, fiji aur Ireland ki teemein apni daavedaari pesh kar rahi hain. Tournament ke match round robin aadhaar par khele ja rahe hain. Sheersh do teemon ko June mein hone vaale round-3 mein khelne ka adhikaar milega. Bangladesh ki team pehli baar kisi FIH aayojan mein khel rahi hai. Use FIH vareeyata kram mein 40vaan sthaan praapt hai jabki fiji ko 71vaan aur omaan ko 36veen vareeyata mili hui hai. Bhaarat 11vein vareeyata praapt desh ke taur par is tournament mein hissa le raha hai jabki Ireland 15veen vareeyata ke saath use jordaar takkar deta huaa najar aaega. Cheen ko 18veen vareeyata praapt hai aur vah Bhaarat tatha Ireland ke liye sabse bada roda saabit ho sakta hai. Pehle din ke mukaabalon ke baad chhah teemon ki taalika mein Bhaarat pehle sthaan par hai jabki cheen doosare sthaan par hai. Bhaarat, cheen aur Ireland ke teen-teen ank hain lekin gol antar ke lihaaj se Bhaarat sabse aage hai. Somvaar ko khele gaye anya mukaabalon mein Ireland ne Bangladesh ko 5-2 se haraaya tha jabki cheen ne omaan ko 4-0 se maat di thi.