Ghotaalon Ne Soniya Aur Manmohan Ke Beech Daali Daraar

Breaking »

Ghotaalon Ne Soniya Aur Manmohan Ke Beech Daali Daraar

nai Delhi . . Kolaget aur relaget ke savaal par jahaan ek taraf mukhya vipakshi dal BJP ne sansad ko thap kar rakha hai, vaheen doosari or Congress se bhi sarkaar ko khaas samarthan naheen mil raha. Congress adhyaksh soniya Gandhi aur pradhaanamantri Manmohan Singh ke beech bhi is maamale mein matabhed ubhar aane ki khabar hai. Raajaneetik halakon mein chal rahi charcha ke mutaabik Congress adhyaksh soniya Gandhi chaahati hain ki sarkaar jis tarah se ek ke baad doosare ghotaale ke aaropon mein ghirti ja rahi hai, use dekhte hue khud pradhaanamantri aage aaen. Unki ichha hai ki 2ji ghotaale se lekar kolaget aur relaget tak sabhi maamalon mein khud pradhaanamantri media ke saamane jaaen aur majabooti se sarkaar ka paksh rakhein. Unke mutaabik isse yah sandesh jaaega ki sarkaar ke paas chhupaane ko kuchh bhi naheen hai. Filhaal choonki sarkaar is par apna paksh theek se naheen rakh pa rahi hai, isliye BJP ke hamlon se aisa maahaul ban raha hai jaise sarkaar ke paas kehne ko kuchh hai hi naheen. Magar, pradhaanamantri is rai ko jyaada ahamiyt naheen day rahe. Vah is masale par media se baat karne ko taiyaar naheen hain. Pradhaanamantri ke kareebiyon ka maanana hai ki party ko is masale par jyaada majabooti se sarkaar ka bachaav karna chaahiye. Raajaneetik halakon mein chal rahi charcha ke mutaabik pradhaanamantri ke kareebiyon ki shikaayat bhi niraadhaar naheen hai. Kaanoon mantri ashvani Kumar aur rel mantri pavan bansal ke paksh mein party us tarah se sakriya naheen hai jis tarah se sarkaar chaahati hai. Donon mantri pradhaanamantri Manmohan Singh ke kareebi maane jaate hain. Manmohan Singh ashvini Kumar ke isteefe ki maang ko khud khaarij kar chuke hain. Magar, party unka bachaav karne ko taiyaar naheen hai. Congress pravaktaaon ke saath kaanoon mantri ki baithak se bhi koi hal naheen nikla. Congress pravaktaaon ka sujhaav tha ki ashvani Kumar pehle khud Loksabha mein bayaan dekar apna paksh rakhein. Uske baad hi ve media mein unka bachaav kareinge. Sootron ke mutaabik party netrutv ki taraf se pravaktaaon ko kaha gaya hai ki ve in donon mantriyon ka jyaada majabooti se bachaav na karein. Inke isteefe ke liye gunjaaish banaae rakhein. Party ke ek hisse ka maanana hai ki in ghotaalon se Manmohan Singh ki chhavi ko to nuksaan pahuncha hi hai, agar sarkaar ne mantriyon ke saath khadi najar aati hai aur pradhaanamantri bade kadam uthaate naheen dikhte hain to party ko bhi khaasa nuksaan pahunchega.

Ghotaalon Ne Soniya Aur Manmohan Ke Beech Daali Daraar https://www.angrejinews.com/pic/7967