Garmi Chait Maheene Mein Hi Jeth Ki Chubhan

India »

Garmi  Chait Maheene Mein Hi Jeth Ki Chubhan

vishesh samvaadadaata . Lucknow uttar pradesh ke sabhi jilon mein somvaar ko subah se hi tej dhoop nikli, jisse mausam mein garmaahat badh gayi hai. Garmi ne apna roop dikhaana shuru kar diya hai. Western UP se lekar Nepal seema se jude taraai kshetr ke jilon mein tej garmi ne dopahar ko shaharon-gaanvon ki haat-baajaar tak ki raunak chheen li hai. Garmi ki badhti tapish ko dekh log kehne lage hain ki abhi yah haal hai to May-June maah ke dinon mein kya hoga? Mausam vibhaag ne agale 24 ghanton mein taapamaan badhne ki sambhaavana jataai hai. Uttar pradesh mausam vibhaag ke adhikaariyon ke mutaabik ravivaar raat pradesh mein poorvaanchal ke kuchh ilaakon mein dhool bhari aandhi chali, jisse kai jagahon par janajeevan prabhaavit huaa. Pichhle 24 ghanto mein Allahabad ka adhiktam taapamaan sabse adhik 41 degree celcius darj kiya gaya. Kanpur ka adhiktam taapamaan 40 3 degree celcius aur Varanasi ka adhiktam taapamaan 39 5 degree celcius darj kiya gaya. Lucknow mein somvaar ko tej garmi ke kaaran log paseene se tar-batar hue. Dopahar ke samay rajdhani ki pramukh sadkon par ikke-dukke vaahan dikhe. Abhi loo ka prakop shuroo naheen huaa hai. Lekin aam ka pana bechne vaale thela dukaanadaaron ke yahaan bheed najar aa rahi hai. Shaam hote hi garmi ka prakop kam huaa. Garmi mein Kanpur-Allahabad evam Varanasi jaise puraane shaharon mein bijli aane-jaane ka silsila bana raha. Bundelakhand se mil rahi soochana bata rahi hai ki vahaan sthiti aur bhi jyaada badatar hai aur peyajal ki killat badhti ja rahi hai. Pathareele bundelakhand mein garmi ka sabse tej asar padta hai. Gorakhpur se lekar aajamagadh mandalon mein garmi ke prakop ne janajeevan ko ast-vyast karna shuroo kar diya hai. In sabhi ilaakon mein do dinon ke andar mausam ne angadaai li aur baarish-aandhi ke baad garmi ne naya rup dikhaaya.

Garmi Chait Maheene Mein Hi Jeth Ki Chubhan https://www.angrejinews.com/pic/5695