Dosti Ke Liye Musalmaanon Aur Ayodhya Par Bhaajapa Soch Badle Mulaayam

Breaking » Wednesday, February 27, 2013

Nai Delhi: Sapa pramukh mulaayam Singh ne Budhvaar ko bhaajapa ke navanirvaavit adhyaksh Rajnath Singh se musalmaanon aur mandir masjid ke prati party ki soch evam vichaaradhaara badalne ke liye pahal karne ka sujhaav dete hue kaha ki agar aisa huaa tab donon dalon ke beech doori kam ho jaaegi. Rajnath Singh ne iske javaab mein kaha ki hamaare aur aapke beech doori kahaan hai, agali baar aap nishchit taur par hamaare saath honge. Raashtrapati ke abhibhaashan par dhanyavaad prastaav par Loksabha mein charcha ke dauraan mulaayam ne kaha, ''Ham Rajnath Singh ko unke bhaashan ke liye badhaai dete hain kyonki unhonne ismein samaajavaadi vichaaradhaara ka ullekh kiya hai. Ab aap party (bhaajapa) ke adhyaksh hai tab in neetiyon ko bhi laagoo karein aur apni vichaaradhaara ko badalein. '' Sapa pramukh ne kaha, ''Aap musalmaanon ke prati apne vichaar ko badalein, tab hamaare aur aapke beech doori kam ho jaaegi. Agar aapki vichaaradhaara theek hoti to hamein inhein (Congress) kyon samarthan dena padta. Mandir masjid ke baare mein hamaari bhaajapa se kaafi doori hai. Is maamale mein desh ko ekajut rakhane ke liye us samay hamaari sarkaar ko (ayodhya mein) goli chalaane ka aadesh dena pada. Kya hamein yah achha laga? Bilkul naheen. '' Mulaayam ne kaha ki deshbhakti, seema suraksha aur bhaasha ke maamale mein unki party aur bhaajapa ki ek neeti hai.