Dahej Maamale Mein Fanse Orissa Ke Kaanoon Mantri Ne Isteefa Diya

India » Tuesday, March 26, 2013

Bhuvaneshvar. . Orissa ke kaanoon mantri raghunaath mohanti ne bahoo dvaara dahej prataadna ka aarop lagaae jaane ke baad shukravaar ko apne pad se isteefa day diya. Mukhyamantri naveen patanaayak ko isteefa saunpane ke baad mohanti ne kaha, mainne naitikta ke aadhaar par isteefa diya hai taaki police svatantr jaanch kar sake. Is aarop mein koi sachchaai naheen hai. Mohanti ki putravadhoo barsa soni mohanti ne mantri, unki patni preetilta (saas) unke bete raajashri (barsa ke pati) aur parivaar ke anya sadasyon ke khilaaf beeti raat baaleshvar taaun police thaane mein ek praathamiki darj karaai. Mohanti ne PTI ko bataaya, ''Mere aur mere parivaar ke khilaaf aarop poori tarah se jhoothe aur bebuniyaad hain. Baaleshvar ke log sachaai jaante hain. Kaanoon ko apna kaam karne deejiye. '' police ne bataaya ki mantri aur anya ke khilaaf barsa ki shikaayat ke aadhaar par IPC ki dhaara 498 (A), 506, 448 aur 34 ke tahat ek maamala darj kiya gaya hai. Mahila ne apni shikaayat mein kaha hai ki usane raajashri se 24 June 2012 mein shaadi ki thi. Shaadi ke dauraan uske maata pita ne 10 lakh rupae nakad aur ghareloo istemaal ki anya vastuen di theen. Barsa ne aarop lagaaya ki unhein dahej ko lekar shaareerik aur maanasik prataadna di gayi. ''Saath hi, ve (sasuraal ke log) ek skaurpiyo aur 25 lakh rupae nakad maang rahe hain. '' unhonne praathamiki mein aarop lagaaya hai ki vah apni saas ke bartaav se hauraan thi aur unhonne is baare mein apne pati aur sasur ko jaankaari di thi. Haalaanki, pati aur sasur donon logon ne barsa ko aur adhik dahej laane ka sujhaav diya jaisa ki usaki saas maang kar rahi thi. Kathit prataadna ke chalte filhaal apne maayake mein rah rahi barsa ne daava kiya ki 13 March ko use agava karne aur usaki hatya karne ki koshish ki gayi thi. Baharahaal, barsa ne kaha hai ki jab kuchh agyaat log use agava karne vaale the us vakt uske parivaar ke anya log mauke par pahunch gaye jisse vah bach gayi