Chhah Raajyon Mein Alert, Delhi Mein Suraksha Badhaai Gayi, India Gate Par Entry Band

Breaking »

Chhah Raajyon Mein Alert, Delhi Mein Suraksha Badhaai Gayi, India Gate Par Entry Band

Nai Delhi: Hyderabad dhamaakon ke baad chhah raajyon mein alert jaari kar diya gaya hai. Idhar, Delhi mein suraksha vyavastha kadi kar di gayi hai. Aam logon ke liye India gate par filhaal entry band kar di gayi hai. Delhi police ne India gate ilaake mein suraksha badha di hai aur iske laun mein logon ki aavaajaahi par rok laga di hai. Sootron ne bataaya ki Hyderabad mein guruvaar shaam ko hue dohare dhamaakon ke baad yah aihatiyaati kadam uthaaya gaya hai. Nai Delhi mein alert ke chalte India gate par aam logon ki entry band kar di gayi hai. Haalaanki isse India gate ilaake mein traffic par koi asar naheen pada hai. Yahaan entry kab tak band rahegi, filhaal is baare mein police ne koi kuchh naheen bataaya hai. Hyderabad dhamaakon ke baad shanivaar ko kendra ne sabhi raajyon ko alert bheja hai, jismein sambhaavit hamlon ko lekar satarkata baratne ki baat kahi gayi hai. Yah alert Hyderabad dhamaakon ki jaanch ke silsile mein vibhinn sandigdhon se poochhataachh mein mili jaankaari ke baad jaari kiya gaya hai.

Chhah Raajyon Mein Alert, Delhi Mein Suraksha Badhaai Gayi, India Gate Par Entry Band https://www.angrejinews.com/pic/2703