'Cheen Se Hod, Saajhedaari Aur Sahayog Ko Taiyaar

India » Friday, April 26, 2013

vishesh pratinidhi . Nai Delhi cheen se Bhaarat ki tulana karte hue videsh mantri Salman khursheed ne kaha hai ki kuchh kshetron mein ham cheen se peechhe ho sakte hain, lekin iski vajah yah hai ki humne vikaas ka alag raasta apnaaya. Unhonne kaha ki ham cheen ke saath hod, saajhedaari aur sahayog karne ko taiyaar hain. Vaanijya sangathan FICCI ki taraf se aayojit ek baithak mein khursheed ne ye baatein kaheen. Is dauraan unhonne nau May ko apne cheen daure ki bhi pushti ki aur bharosa jaahir kiya ki ghuspaith ka masala jald sulajh jaaega. Cheen ke saath chal rahe maujooda vivaad ke maddenajar unhonne kaha ki hamaara desh bada aur kaamayaab hai aur tulanaatmak najariye se ham apne padosi deshon se adhik kaamayaab hain. Yahaan tak ki cheen se bhi adhik kaamayaabi hamein mili hai. Lekin ham cheen ke saath kai baaton mein hod karte hue sahayog bhi kareinge. Kai masalon par aapasi matabhed hote hue bhi ham sahayog ki baatein karte raheinge. Khursheed ne kaha ki yah vakt hamaare liye yathaarthavaadi aur aashaavaadi hone ka hai. Videsh mantri ne kaha ki kisi masale par matabhed ka matlab vidroh naheen hota hai. Kisi masale par aap sahamat ya asahamat ho sakte hain lekin aapko bharosa rakhana hoga ki asahamat hone ka matlab vidroh naheen hai. Unhonne kaha ki log mujhse aksar poochhate hain ki aakhir Bhaarat ke saath kya baat hai ki iske sabhi padosi dost naheen hain. Lekin dosti ke baare mein meri soch yah hai ki jab aap khule man se baat karte hain tab aap kuchh apekshaaen bhi karte hain. Khursheed ne kaha ki agar ham maaladeev se baat karte samay apne ko maaladeev ke aakaar ka samajhein, Bangladesh se baat karte vakt Bangladesh ki aarthik dasha se apni tulana karein aur cheen se baat karte samay apne ko isliye chhota samajheein ki cheen ke paas kaafi sankhya mein parmaanu bam hain to ham apne desh ke saath bhala naheen kareinge.