Bhagava Aatankvaad Par Shinde Bole, Mere Bayaan Ko Galat Samjha Gaya

Breaking »

Bhagava Aatankvaad Par Shinde Bole, Mere Bayaan Ko Galat Samjha Gaya

Nai Delhi: 'Hindu aatank' sambandhi vivaadaaspad tippani ko lekar bhaajapa ke hamle ki jad mein aae gruhamantri susheel Kumar shinde ne Budhvaar ko bajat satr ki poorv sandhya par ek bayaan jaari kiya aur apne bayaan par maafi maangi. Unhonne kaha ki unki tippaniyon ko galat samjha gaya. Loksabha mein sadan ke neta shinde ka bahishkaar karne ki bhaajapa ne ghoshana ki thi. Shinde ne is baat ko rekhaankit kiya ki unki aatankvaad ko dharm se ya raajaneetik sangathanon se jodne ki koi mansha naheen thi. Unhonne kaha, 'Pichhle maah Jaipur mein diye gaye mere bayaan ne galatafahamiyaan paida kar Dean. Ise aisa samjha gaya ki main aatankvaad ko kisi vishesh dharm se jod raha hoon aur kuchh raajaneetik sangathanon par aatanki shiviron ke aayojan mein shaamil hone ka aarop laga raha hoon. ' Shinde ne kaha, 'Meri aatank ko kisi dharm se jodne ki koi mansha naheen thi. Jaipur mein mere sankshipt bhaashan mein aatank ko sangathanon se jodne ka koi aadhaar naheen tha. ' unhonne kaha, 'Choonki mere bayaan kea lekar vivaad paida huaa. Isliye main yah spashteekaran jaari kar raha hoon aur un logon se khed jaahir karta hoon jinhonne mere bayaan se aahat mahasoos kiya. ' Gruhamantri ko bhaajapa ki or se is bayaan ko lekar kade hamle ka saamana karna pad raha tha. Bhaajapa ne guruvaar se shuroo ho rahe bajat satr mein is mudde ko uthaane ka iraada jaahir kiya tha. Shinde ne kaha, 'Main yah sunishchit karne ke liye ki Bhaarat ke saamaajik taane baane mein samarasata kaayam rahe, apni kshamata ke anusaar behtar tareeke se apne kartavyon ka paalan jaari rakhoonga. ' Isse pehle, Loksabha adhyaksh meera Kumar dvaara bajat satr se ek din pehle aahoot sarvadaleeya baithak ke baad varishth BJP neta Lal Krishna Advani ne kaha tha ki satta paksh aur vipaksh donon hi prayaas kareinge ki sadan ki kaaryavaahi suchaaroo roop se sanchaalit karne ke liye kya kiya jaae. BJP adhyaksh Rajnath Singh ne is bhadkaaoo bayaan ko lekar shinde ke iraadon par savaal uthaaya tha. Unhonne shinde ki tippani ke virodh mein sansad maarg par pradarshan kar rahe party kaaryakartaaon ko sambodhit karte hue kaha ki gruhamantri ki yah tippani vote bank ki raajaneeti ke liye desh ko baantane ki saajish hai. Isse pehle, bajat satr shuroo hone se ek din pehle BJP ne Budhvaar ko chetaavani di thi ki gruhamantri susheel Kumar shinde jab tak BJP par 'Hindu aatanki' shivir chalaane ke apne bayaan ko vaapas lekar maafi naheen maangate, sansad ki kaaryavaahi chal paana sambhav naheen hai. Sansad satr shuroo hone se pehle Loksabha adhyaksh dvaara bulaai jaane waali paaramparik sarvadaleeya baithak ke baad Sushma ne samvaadadaataaon se kaha tha ki ham sansad ki kaaryavaahi suchaaroo roop se chalaane ke paksh mein hain. Lekin sadan achhe se chale, iske liye poorv shart yah hai ki shinde ne ham par jo aarop lagaae hain, pehle usaka niraakaran ho. Vipaksh ki neta ke anusaar unhonne meera Kumar se kaha ki shinde gruhamantri hone ke saath hi Loksabha mein sadan ke neta bhi hain. Mainne Loksabha adhyaksh se kaha ki shinde ne aarop lagaaya hai ki BJP aur raashtreeya swayamsevak sangh hindu aur bhagava aatanki prashikshan shivir chalaate hain. Agar aisa hai, to mukhya vipakshi dal BJP ke sadasya ke roop mein mera vipaksh ka neta rahana aur BJP sadasyon ka sadan mein aana uchit naheen rahega. At: Sadan ko suchaaroo roop se chalaane ke liye pehle is baat ka niraakaran kiya jaae. Unhonne kaha, agar ham aatanki shivir chalaate hain, to hamaare saath aatankiyon ka vyavahaar kiya jaae. Aise mein ham sansad ke sadasya kaise rah sakte hain? (input agency se bhi)

Bhagava Aatankvaad Par Shinde Bole, Mere Bayaan Ko Galat Samjha Gaya https://www.angrejinews.com/pic/2409