Bhaarat Ko 2.32 Arab Dollar Ki Madad Dega Japan
Business » Wednesday, March 27, 2013
tokyo. . Bhaarat aur Japan ne dwipaksheeya rishton ko majaboot karne ke liye thos pahal ki hai. Global saajhedaari khaas kar aarthik aur suraksha kshetron mein saajhedaari ko badhaava dene ke liye donon desh sahamat hue hain. Japan dhaanchaagat suvidhaaon ke nirmaan ke liye Bhaarat ko 2.32 arab dollar ki sahaayata dega. Videsh mantri Salman khursheed ke saath mulaakaat ke baad Japan ke videsh mantri fumiyo kishida ne kaha, 'Hamein ek majaboot sahayogi rishton ka nirmaan hone aur Bhaarat ke saath rananeetik evam global saajhedaari ki ummeed hai. ' mangalvaar ko mulaakaat ke dauraan kishida ne Bhaarat ke liye dhaanchaagat suvidhaaon ke nirmaan ke vaaste 220 arab yen (2.32 arab dollar) ki sahaayata aur Bhaarat ki vitteeya rajdhani Mumbai mein sabave pariyojana ke liye 71 arab yen (75.31 karod dollar) ka karj dene ki peshakash ki. Japani samaachaar agency kyodo ki report ke mutaabik, khursheed ne Japan ki sahaayata ki peshakash ki yah kehte hue saraahana ki, 'Is tarah ki madad ka istemaal hamaari dhaanchaagat suvidhaaon ke vikaas mein kiya jaata raha hai. Delhi metro pariyojana se Delhi ke raashtreeya rajdhani kshetr mein laakhon bhaarateeya naagrikon ke jeevan par sakaaraatmak prabhaav pada hai. ' kyodo ki report ke mutaabik, yah karj package chaar pariyojanaaon ke liye hai jismein nai Delhi aur Mumbai ko jodne waali ek maal dhulaai rel pariyojana aur dakshin Bhaarat mein ek sabave nirmaan ki pariyojana shaamil hai. Donon neta bhaavi haai speed rel pariyojana par sahayog badhaane par bhi sahamat hue. Khursheed ne kaha, 'Suraksha ke kshetr mein hamaare beech sahayog behtar dhang se aage badh raha hai. Is saal ki shuruaat mein humne Japani samudri aatmaraksha bal ke pramukh ka Bhaarat mein svaagat kiya aur aapke raksha mantri is saal ke ant tak Bhaarat ki yaatra par aane vaale hain. Bhaarat aur Japan ke beech pratham samudri maamalon ki baatcheet is saal January mein hui. ' unhonne kaha, 'Asia ki do sabse bade lokataantrik deshon ke taur par ham Asia prashaant kshetr mein aapasi sahayog badhaane par sahamat hain. Videsh mantri kishida aur ham is baat par sahamat hain ki Bhaarat aur Japan poorvi Asia shikhar sammelan ki prakriya ke bheetar apni gatividhiyon ke beech taalamel sthaapit kareinge. ' kishida ne kaha, 'Ham samudri suraksha aur sanyukt koshishon ke jariye suraksha sunishchit karne ke liye ek doosare ka sahayog karne ke saath-saath dwipaksheeya raajaneetik vaarta evam Japan, America aur Bhaarat ke beech tripksheeya raajaneetik vaarta ko aage badhaane par sahamat hain. ' kyodo ke mutaabik, donon deshon ke beech asainya parmaanu oorja sahayog ke tahat donon neta dwipaksheeya parmaanu oorja sandhi par baatcheet ko aage badhaane par bhi sahamat hue. Donon netaaon ne pradhaanamantri Manmohan Singh ki Japan yaatra ke baare mein bhi charcha ki jo pichhle saal November se hi talati ja rahi hai, lekin yah 'Jald hi' ho sakti hai. Khursheed ne kaha, 'Hamaari mahatvaakaanksha apne sambandhon ko 634 meter oonchi skaaitri kamyunikeshans tower se bhi thoda ooncha le jaane ki hai. ' yah tower tokyo mein ek naya laindamaark hai.