Bhaajapa Ne Poochha, Soochana Thi To Hamla Kyon Naheen Roka

Breaking »

Bhaajapa Ne Poochha, Soochana Thi To Hamla Kyon Naheen Roka

Nai Delhi: Khufiya soochana upalabdh rahane ke baavajood Hyderabad mein guruvaar ki shaam hue dohare bam visfot ko bhaarateeya janta party (bhaajapa) ne 'Badi chook' karaar dete hue shukravaar ko kendra ki sanyukt pragatisheel gathabandhan (samprag) sarkaar ko uske aatankvaad ke khilaaf ladaai ke liye pratibaddhata ke daave ke liye fatkaar lagaai aur keindreeya gruhamantri susheel Kumar shinde se kaarravaai mein iski jhalak dikhaane ka aagrah kiya. Vipaksh ki neta Sushma Swaraj ne Loksabha mein shinde ke bayaan ke baad kaha, "Aatankvaad se ladaai mein aap pratibaddhata dikhaaen. Kya kendra sarkaar ki bhoomika sirf raajyon ko sachet karne tak hai ya fir aatanki gatividhi rokane ki bhi hai? " Bhaajapa neta ne kaha ki kendra sarkaar ne Bengaluru aur Mumbai ko bhi aatankvaadi hamle ke prati sachet kiya tha. Unhonne yah jaanana chaaha ki in donon shaharon ko surakshit banaane ke liye kya kadam uthaae gaye. Unhonne yah jaanana chaaha ki Hyderabad visfot Afzal guru ki faansi se juda to naheen hai aur savaal kiya ki sarkaar ne sansad par hamle ke doshi ko fande par latakaane mein nau varsh ka samay kyon lagaaya. Vipaksh ki neta ne yah bhi jaanana chaaha ki kya ye visfot Hyderabad mein majalis-A-ettehaadul muslimeen (MIM) netaaon ke haal ke bhadkaaoo bhaashan se sambaddh to naheen hain? Yah kehte hue ki aatankvaad ke mudde par sarkaar aur vipaksh mein koi taalamel naheen, neta pratipaksh ne kaha ki donon ko is museebat ke khilaaf ekajut ho kar ladne ki jaroorat hai. Isse pehle, Hyderabad bam visfot par Loksabha mein bahas ki shuruaat karte hue neta pratipaksh ne kaha ki pehle se khufiya jaankaari rahane par sarkaar ki javaabadehi badh jaati hai. Unhonne kaha, "Gruh mantri kehte hain ki iski khufiya jaankaari pehle se thi aur jaankaari raajyon ko day di gayi thi. Yadi pehle se satark kar diya gaya tha, fir bhi hamla huaa aur nirdosh logon ka maara jaana ek badi chook hai. " unhonne kaha, "Yadi aatankvaadi hamle ke baare mein pehle se khufiya jaankaari thi, to sarkaar ki javaahadehi aur bhi badh jaati hai. . Raajya va kendra ki sarkaarein kya kar rahi theen. " Sushma ne kaha ki aatankvaadiyon ka koi majahab naheen hota. Desh ko aatankvaad se ladne ke liye ekajut hona chaahiye.

Bhaajapa Ne Poochha, Soochana Thi To Hamla Kyon Naheen Roka https://www.angrejinews.com/pic/2563