Baajeegari Ka Bajat, Aarthik Sankat Gaharaaega Yashavant Sinha

Breaking » Thursday, February 28, 2013

Nai Delhi: Poorv vittamantri aur BJP saansad yashavant sinha ne guruvaar ko pesh aam bajat ko 'Baajeegari ka bajat' karaar dete hue kaha ki vittamantri pi Chidambaram ne jo bajat pesh kiya hai, usase lagta hai ki bhavishya mein aarthik sankat aur gaharaaega. Yashavant sinha ne sansad parisar mein samvaadadaataaon se kaha ki raajakosheeya ghaata, mudraasfeeti aadi ki chunautiyon ke beech inke aankadon mein baajeegari ki gayi hai. Unhonne kaha ki vittamantri ne raajakosheeya ghaate ko 5.2 feesadi par rakhane ka shreya liya hai, jabki Kelkar samiti ne ise 5.3 feesadi rakhane ki sifaarish ki thi. Raajakosheeya ghaata agale saal 4.8 feesadi par rakhane ka lakshya rakha hai. Dekhte hain yah kahaan tak sahi rahata hai. Poorv vittamantri ne kaha ki desh mein buniyaadi dhaanche mein nivesh ke liye dhan ki kami naheen, balki pariyojanaaon ko manjoori, bhoomi adhigrahan, paryaavaran manjooriyon ki samasyaaen rahati hain, jis par Chidambaram ne kuchh naheen kaha. Unhonne NDA sarkaar dvaara prastaavit mahatvaakaankshi nadi jodo pariyojana par kuchh naheen kaha, jisse arthavyavastha ko gati mil sakti thi. Sinha ne kaha ki vittamantri ne videshi nivesh par bade jor dekar apni baat kahi jaise videshi nivesh se hi saari dikkatein door ho jaaengi aur desh apne dam par naheen, balki videshi madad se aarthik vikaas karega. Yahi UPA ka faurmoola hai. Unhonne kaha ki sarkaar khaadya suraksha vidheyak ko isi satr mein laane ka daava kar rahi hai, jiske liye bajat mein 10 hajaar karod rupaye ka aavantan prastaavit hai, jabki visheshagya is kaanoon ke laagoo hone ke baad arthavyavastha par ek lakh karod rupaye ke bhaar ka anumaan laga rahe hain. Sinha ke mutaabik sabse jyaada niraasha is baat se hui ki pratyaksh kar sanhita vidheyak ke sambandh mein sthaayi samiti dvaara pichhle saal 9 March ko hi report diye jaane ke baad bhi is par koi amal naheen huaa. Achha hota ki Chidambaram naya aayakar kaanoon laate, lekin unhonne asthaayi badlaav hi kiye hain. BJP neta ne haalaanki aavaas par aayakar mein ek lakh rupaye ki atirikt kar chhoot ka svaagat karte hue kaha ki kareeb ek dashak baad aavaas kshetr mein is tarah ki raahat di gayi hai. Isse pehle NDA sarkaar ne is par 1.5 lakh rupaye ki chhoot di thi. Sinha ne kaha ki Chidambaram ne utpaad shulk mein kuchh khaas naheen kiya. Alag-alag utpaadon par ghatat-badhat karne ki bajaay ismein ekaroopata laani chaahiye thi. Is bajat mein vastu evam seva shulk (jeeesati) ke liye bhi koi rodamaip naheen hai. Haalaanki keindreeya bikri shulk (seeesati) mein raajyon ko muaavaje ke taur par 9,000 karod rupaye ke aavantan ke prastaav ka svaagat karte hue BJP saansad ne kaha ki ham iski maang karte rahe hain. Unhonne kaha ki bajat se spasht hai ki kareeb 18 hajaar karod rupaye ka atirikt kar bhaar logon par padega, jismein pratyaksh kar par 13,000 karod rupaye aur apratyaksh kar par 4,700 karod rupaye ka atirikt bojh rahega. Iska seedha asar mahangaai par padega. Sinha ne kaha ki desh ke saamane nivesh ka bada sankat hai aur ismein jaan daalne ke liye koi ummeed vaala sujhaav is bajat mein naheen hain. Isse niveshakon ka utsaah naheen badhega. Vishvaas mein kami bani rahegi.