BJP Ab PM Ke Isteefe Se Aage Ki Soch Rahi Hai

India »

BJP Ab PM Ke Isteefe Se Aage Ki Soch Rahi Hai

vishesh samvaadadaata. Nai Delhi koyala ghotaale mein kaanoon mantri ashvini Kumar aur pradhaanamantri Dr. Manmohan Singh ke isteefe ki maang par adi BJP ab ise aur aage le jaane ki koshish mein hai. Vah aisi sthiti banaana chaahati hai ki sarkaar ko khud hi chunaav mein utarane ke liye baadhya hona pade. Chunaav se mahaj kuchh maheene pehle ab BJP ki taiyaari hai ki vah desh mein aisa maahaul banaae ki lage ki yah sarkaar naam bhar ki hai. Iske liye vah sadkon par utarane ki yojana par bhi vichaar kar rahi hai. BJP sootron ka kehna hai ki jis tarah se is vakt DMK, TMC jaise sarkaar ka saath dene vaale dal behad naaraaj hain, usase yah tay hai ki ab UPA sarkaar ke liye aage ka raasta aasaan naheen hai. Haalaanki maayaavati ne ab tak sarkaar par jyaada teekhe hamle naheen kiye hain, lekin jis tarah se mulaayam Singh Yadav khulkar sarkaar par hamle kar rahe hain, usase BJP ko lagne laga hai ki is satr mein naheen to agale satr mein mulaayam Singh sarkaar ko chunaav ke raaste par chalne ke liye majaboor kar sakte hain. Yahi vajah hai ki BJP ke senior neta bhi ab apne pravaktaaon ke jariye is maamale ko aage badhaane ki taiyaari mein hain. Haalaanki pichhle saal bhi BJP ne pradhaanamantri ke isteefe ki maang ko lekar kai dinon tak sansad ko naheen chalne diya tha, lekin baad mein usane is mudde ko chhod diya tha. Ab sthitiyaan itni badal gayi hain ki BJP kisi bhi haalat mein is maang par peechhe naheen hatne ja rahi. Vah to ab is rananeeti par kaam kar rahi hai ki sirf Manmohan Singh hi isteefa na dein balki sarkaar ko khud hi vakt se pehle chunaav karaane ka ailaan karna pade. Party netaaon ka kehna hai ki Loksabha mein mangalvaar ki ghatna ke baad party ne yah man bana liya hai ki is satr mein vah sarkaar ko koi kaam naheen karne degi. Aisa karke vah sansad ke manch ke jariye janta ko yah bataane aur maahaul banaane ki koshish karegi ki yah sarkaar nikmmi ho gayi hai. BJP ko lagta hai ki is vakt haalaat bhi uske paksh mein ja rahe hain. Ek or sarabajeet aspataal mein hai to doosari taraf cheen aage badh raha hai. Iske alaava Supreme court sarkaar ko fatkaar laga raha hai aur JPC ke mudde par vipaksh lagbhag ek ho gaya hai. Aise mein ye saari aisi paristhitiyaan hain, jinka use faayda uthaana chaahiye.

BJP Ab PM Ke Isteefe Se Aage Ki Soch Rahi Hai https://www.angrejinews.com/pic/7290