Asam Mein Sthaaneeya Chunaav Police Firing Mein 13 Samet 19 Ki Maut

India » Wednesday, February 13, 2013

Gvaalapaada (asam): Asam mein sthaaneeya chunaav ka virodh kar rahe janajaateeya guton aur police ke beech hinsak jhadap mein kul 19 logon ki maut ho gayi hai, jinmein se 13 ki maut police firing mein hui. Is beech, raajya ke mukhyamantri tarun gogoi ne firing mein maare gaye pratyek vyakti ke parijanon ko paanch lakh rupaye ka muaavaja dene ka ailaan kiya hai. Rajdhani Guwahati se 120 kilometer door gvaalapaada mein police ne panchaayat chunaavon ka virodh kar rahe raabha janajaati ke logon par us vakt firing ki, jab ye log gaanvon mein aagajani karne lage aur sarkaari adhikaariyon par bhi hamla bol diya. Police ne kaha ki upadraviyon ne CRPF ke ek javaan par bhi chaakoo se vaar kiya aur javaanon se hathiyaarein chheenane ki koshish keen. Chhah logon ki maut guton ke aapasi sangharsh mein hui. Vaaradaat ke baad kaanoon-vyavastha bahaal karne ke liye sena ko sthaaneeya police ki madad ke liye tainaat kar diya gaya hai. Raajya ke gruhasachiv ne jaankaari di ki jila prashaasan ke aagrah par sena ke kareeb 500 javaanon ko tainaat kiya gaya hai aur do ilaakon mein curfew laagoo kar diya gaya hai. Raabha janajaati is ilaake mein svaayattata ki maang kar raha hai aur sarkaari niyantran ko khaarij karta raha hai.