Afghanistan Ki Sefti Par Bhaarat-cheen Hain Saath

World »

Afghanistan Ki Sefti Par Bhaarat-cheen Hain Saath

Ranjit Kumar . Nai Delhi Afghanistan mein taalibaan ke satta mein lautane ki aashanka se chintit Bhaarat aur cheen ne aapasi sahayog aur taalamel se kaam karne ka faisala kiya hai. Afghanistan se agale saal tak ameriki faujon ke lautane ke ailaan ke maddenajar Bhaarat-cheen mein yah aham sahamati bani hai. Shaanti ke liye uthaaenge kadam: Donon deshon ke beech Afghanistan masale par pehli baar hui uchch stareeya baatcheet mein is baat par sahamati bani. Baatcheet ke baad cheen ne kaha hai ki donon deshon ki samaan rai hai ki Afghanistan masale ka asar kshetreeya shaanti aur sthirta par padega. Is masale par aapasi salaah mashavara se donon deshon ko aapasi sahayog gahra karne mein madad milegi aur apni neetiyon mein taalamel bithaane ka mauka milega. Cheen ke pradhaanamantri li kh chhyaang ke agale maheene prastaavit Bhaarat daure ke pehle donon deshon ke beech is aham masale par baatcheet hona aham hai. Cheen ka kehna hai ki Bhaarat aur vah is ilaake ke do mahatvapoorn desh hain isliye Afghanistan masale par salaah mashavara hone se Afghan masale ke hal mein madad milegi. Bhaarat-cheen ke saajha hit: Afghanistan madhya, dakshin aur poorv Asia ko jodne vaala ek mahatvapoorn desh hai aur poore ilaake ke vikaas ki kunji uske haath mein hai. Vahaan ek kharab dollar ke khanij sansaadhan hone ka pata laga hai jiska cheen dohan karna chaahata hai. Udhar, Afghanistan ke jariye Bhaarat madhya Asia ke paanch deshon se apne gahre aarthik aur raajaneetik rishte bana sakta hai. Is tarah Afghanistan mein shaanti aur sthirta se Bhaarat aur cheen donon ke hit jude hain. Afghanistan mein Bhaarat abhi tak jahaan do arab dollar nivesh kar chuka hai vaheen cheen vahaan ke khanij sansaadhanon ka dohan karne ke liye arabon dollar ki yojana bana chuka hai. Agar vahaan taalibaan satta mein lautata hai to vikaas ki sabhi videshi yojanaaen thap ho sakti hain. Pak ki bhoomika: Raajanayik paryavekshakon ka maanana hai ki Afghanistan mein taalibaan par ankush lagaane mein Pakistan sena ki bhoomika aham ho sakti hai. Aur agar cheen Pak sena par aisa karne ka dabaav banaata hai to taalibaan ko satta mein lautane se roka ja sakta hai. Taalibaan agar satta mein lautata hai to Afghanistan ke saamaajik aur aarthik maahaul mein badlaav ka jo daur aaya tha vah palat sakta hai aur iska asar poore ilaake par padna tay hai.

Afghanistan Ki Sefti Par Bhaarat-cheen Hain Saath https://www.angrejinews.com/pic/6165