2030 Tak Teesari Sabse Badi Arthavyavastha Banega Bhaarat Cameron

Business »

2030 Tak Teesari Sabse Badi Arthavyavastha Banega Bhaarat  Cameron

Mumbai: Britain ke pradhaanamantri David Cameron ne Bhaarat aur Britain ke beech 'Vishesh sambandh' par jor dete hue kaha ki yah bhavishya mein aseem sambhaavnaaon ke liye jaroori hai. Mumbai mein Britain ki company Unilever ki bhaarateeya ikaai Hindustan Unilever ke karmachaariyon ke saath baatcheet ke dauraan Cameron ne kaha, ''Main chaahata hoon ki Britain aur Bhaarat ke beech vishesh rishte hon. . Ye rishte bhavishya ke liye hon na ki ateet ke baare mein. '' teen din ki Bhaarat yaatra par somvaar ko pahunche Cameron ne Bhaarat ko sadi ki mahaan taakat bataate hue kaha ki is desh ki jabaradast aarthik vruddhi ke bal par yah 2030 tak teesari sabse badi arthavyavastha banane ja raha hai. Unhonne kaha, ''Main ab tak ka ek sabse bada pratinidhimandal lekar Bhaarat aaya hoon. Aapki vividhta ki mahaan taakat aur aapki arthavyavastha ki jabaradast kshamata aapko 2030 tak sheersh teen arthavyavasthaaon mein shumaar karne ja rahi hai. '' Cameron ne kaha, ''Aap duniya mein sabse bada lokatantr hain aur hamaara desh sabse puraane lokatantr vaala desh hai. '' unhonne kaha, ''Main apne saath premium league lekar aaya hoon jismein sheersh vishvavidyaalaya, sangrahaalaya shaamil hain. Ham aapki sanskruti, aapki companiyon, aapke kaarobaar, aapke logon ke saath alag-alag tareeke se judna chaahate hain. '' Cameron mangalvaar ko Delhi ke liye ravaana honge jahaan vah pradhaanamantri Manmohan Singh se vibhinn muddon par charcha kareinge. Aisi sambhaavana hai ki kal sheersh netaaon ke saath Cameron ki baithak mein unase englo-itaaliyn company se jude 3,600 karod rupaye ke helicopter ghotaala maamale mein aur jaankaari maangi ja sakti hai. Agasta vestalaind se jude saude ke tahat teen heleekauptaron ki aapoorti pehle hi ki ja chuki hai. Inka nirmaan dakshin-pashchim England mein huaa hai. Unhonne kaha ki Britain mein bhaarateeya mool ke 15 lakh log hain aur yah hamaare sambandhon ki taakat hain. Unke saath aae 100 sadasyeeya kaarobaari pratinidhimandal mein bhaarateeya mool ke kaarobaari aur bhaarateeya mool ke saansad bhi shaamil hain. Cameron ne kaha ki donon deshon ke beech kaarobaari sambandh pehle se hi majaboot hai jahaan Britain Bhaarat mein nivesh karne vaala sabse bada Europeeya niveshak hai. Vaheen, Europe mein aadha bhaarateeya nivesh akele Britain mein laga hai. Britain ke pradhaanamantri ne kaha ki vah chaahate hain ki unke desh ki companiyaan Mumbai aur Bengaluru ke beech 1,000 kilometer ke ek galiyaare mein nae shahar aur jile viksit karne mein Bhaarat ki madad karein jisse 25 arab dollar moolya ki nivesh pariyojanaaon ka srujan hoga. Cameron ne kaha ki vah chaahate hain ki Britain ki farmein bhaarateeya aur Britain ki sarkaaron ke saath milkar desh ki vitteeya rajdhani Mumbai ko praudyogiki kendra Bengaluru se jodne ke liye nau jilon ka vikaas karein. Unhonne kaha, ''Main apne saath vaastukaaron, niyojanakartaaon aur vitt visheshagyon ko laaya hoon jo sampoorn samaadhaan nikaal sakte hain. Britain mein bhaarateeya vidyaarthiyon ke mudde par unhonne kaha ki Britain ke vishvavidyaalayon mein padhne aur rukane ke liye aane vaale bhaarateeya vidyaarthiyon ki sankhya ki koi seema naheen hai. Unhonne kaha ki unke desh mein is tathya ko lekar jabaradast utsaah hai ki Bhaarat apne vishvavidyaalayon mein 4 karod seatein jodne ki yojana bana raha hai. ''Ham is baat ko lekar bhi utsaahit hain ki aap svaasthya par kharch doguna karne ja rahe hain aur ham ye sevaaen upalabdh karaane mein aapki madad karna chaahate hain. ''

2030 Tak Teesari Sabse Badi Arthavyavastha Banega Bhaarat Cameron https://www.angrejinews.com/pic/2208