yam dviteeya

yam dviteeya
aadhikaarik naam yam dviteeya
anuyaayi hindu, bhaarateeya, bhaarateeya pravaasi
uddeshya sarvakaamana poorti
tithi kaartik maas ke shukl paksh ki dviteeya

bhaai dooj (bhaatrudviteeya) kaartik maas ke shukl paksh ki dviteeya tithi ko manaae jaane wala hindu dharm ka parv hai jise yam dviteeya bhi kehte hain. bhaaidooj mein har bahan roli evam akshat se apne bhaai ka tilk kar uske ujjval bhavishya ke liye aasheesh deti hain. bhaai apni bahan ko kuchh upahaar ya dakshina deta hai. bhaaidooj divaali ke do din baad aane wala aisa parv hai, jo bhaai ke prati bahan ke sneh ko abhivyakt karta hai evam bahanein apne bhaai ki khushahaali ke liye kaamna karti hain. is tyohaar ke peechhe ek kinvadanti yeh hai ki yam devata ne apni bahan yami (yamuna) ko isi din darshan diya tha, jo bahut samay se usase milne ke liye vyaakul thi. apne ghar mein bhaai yam ke aagaman par yamuna ne prafullit man se usaki aavabhagat ki. yam ne prasann hokar use varadaan diya ki is din yadi bhaai-bahan donon ek saath yamuna nadi mein snaan kareinge to unki mukti ho jaaegi. isi kaaran is din yamuna nadi mein bhaai-bahan ke ek saath snaan karne ka bada mahatva hai. iske alaava yami ne apne bhaai se yeh bhi vachan liya ki jis prakaar aaj ke din usaka bhaai yam uske ghar aaya hai, har bhaai apni bahan ke ghar jaae. tabhi se bhaaidooj manaane ki pratha chali aa rahi hai. jinki bahanein door rahati hain, ve bhaai apni bahanon se milne bhaaidooj par avashya jaate hain aur unase teeka karaakar upahaar aadi dete hain. bahanein peedhiyon par chaaval ke ghol se chauk banaati hain. is chauk par bhaai ko baitha kar bahanein unke haathon ki pooja karti hain.

vidhi

is pooja mein bhaai ki hatheli par bahanein chaaval ka ghol lagaati hain uske oopar sindoor lagaakar kaddoo ke fool, paan, supaari mudra aadi haathon par rakhakar dheere dheere paani haathon par chhodte hue kuchh mantra bolti hain jaise "ganga pooje yamuna ko yami pooje yamaraaj ko, subhadra pooja Krishna ko, ganga yamuna neer bahe mere bhaai ki aayu badhe" isi prakaar kaheen is mantra ke saath hatheli ki pooja ki jaati hai " saanp kaate, baagh kaate, bichhoo kaate jo kaate so aaj kaate" is tarah ke shabd isliye kahe jaate hain kyonki aisi maanyata hai ki aaj ke din agar bhayankar pashu kaat bhi le to yamaraaj ke doot bhaai ke praan naheen le jaaenge. kaheen kaheen is din bahanein bhaai ke sir par tilk lagaakar unki aarti utaarati hain aur fir hatheli mein kalaava baandhati hain. bhaai ka munh meetha karne ke liye unhein maakhan misri khilaati hain. sandhya ke samay bahanein yamaraaj ke naam se chaumukh deeya jalaakar ghar ke baahar rakhati hain. is samay oopar aasmaan mein cheel udta dikhaai de to bahut hi shubh maana jaata hai. is sandarbh mein maanyata yeh hai ki bahanein bhaai ki aayu ke liye jo duaa maang rahi hain use yamaraaj ne kubool kar liya hai ya cheel jaakar yamaraaj ko bahanon ka sandesh sunaaega.

maanyata

bhaarateeya mein jitne bhi parv tyauhaar hote hain ve kaheen na kaheen lokamaanyataaon evam kathaaon se judi hoti hain. is tyauhaar ki bhi ek pauraanik katha hai. katha ke anusaar. yami yamaraaj ki bahan hain jinse yamaraaj kaafi prem va sneh rakhate hain. kaartik shukl paksh ki dviteeya tithi ko ek baar jab yamaraaj yami ke paas pahunche to yami ne apne bhaai yamaraaj ki khoob seva satkaar ki. bahan ke satkaar se yamaraaj kaafi prasann hue aur unase kaha ki bolo bahan kya varadaan chaahiye. bhaai ke aisa kehne par yami boli ki jo praani yamuna nadi ke jal mein snaan kare vah yamapuri na jaae. yami ki maang ko sunakar yamaraaj chintit ho gaye. yami bhaai ki manodasha ko samajhakar yamaraaj se boli agar aap is varadaan ko dene mein saksham naheen hain to yeh varadaan deejiye ki aaj ke din jo bhaai bahan ke ghar bhojan kare aur Mathura ke vishraam ghat par yamuna ke jal mein snaan kare us vyakti ko yamalok naheen jaana pade. is pauraanik katha ke anusaar aaj bhi paramparaagat taur par bhaai bahan ke ghar jaakar unke haathon se banaaya bhojan karte hain taaki unki aayu badhe aur yamalok naheen jaana pade. bhaai bhi apne prem va sneh ko prakat karte hue bahan ko aasheervaad dete hai aur unhein vastr, aabhooshan evam anya upahaar dekar prasann karte hain.

chitragupt jayanti

iske alaava kaayasth samaaj mein isi din apne aaraadhya Dave chitragupt ki pooja ki jaati hai. kaayasth log svarg mein dharmaraaj ka lekha-jokha rakhane vaale chitragupt ka poojan saamoohik roop se tasveeron athva moortiyon ke maadhyam se karte hain. ve is din kaarobaari baheekhaaton ki pooja bhi karte hain. uttar Bhaarat ke kuchh kshetron mein isi din 'godhan' naamak parv manaaya jaata hai jo bhaaidooj ki tarah hota hai.