vikram batra

```vikram batra bhaarateeya sena ke ek adhikaari the jinhonne Kargil yuddh mein abhootapoorv veerata ka parichay dete hue veeragati praapt ki. unhein maranoparaant Bhaarat ke sarvochch veerata sammaan paramaveer chakr se sammaanit kiya gaya.

anukram

praarambhik jeevan

paalamapur nivaasi ji.L. batra aur kamalakaanta batra ke ghar 9 September 1974 ko do betiyon ke baad do judvaan bachchon ka janm hua. maata kamalakaanta ki shreeraamacharitmaanas mein gahari shraddha thi to unhonne donon ka naam love-kush rakha. love yaani vikram aur kush yaani vishaal. pehle deeevi school, fir central school paalamapur mein daakhil karavaaya gaya. sena chhaavani mein school hone se sena ke anushaasan ko dekh aur pita se desh prem ki kahaaniyaan sunane par vikram mein school ke samay se hi desh prem prabal ho utha. school mein vikram shiksha ke kshetr mein hi avval naheen the, balki table tennis mein avval darje ke khilaadi hone ke saath unamein saanskrutik kaaryakramon mein badh-chadhkar bhaag lene ka bhi jajba tha. jama do tak ki padhaai karne ke baad vikram Chandigarh chale gaye aur deeevi college, Chandigarh mein vigyaan vishay mein snaatak ki padhaai shuroo kar di. is dauraan vah NCC ke sarvashreshth kaidet chune gaye aur unhonne ganatantr diwas ki parade mein bhi bhaag liya. unhonne sena mein jaane ka poora man bana liya aur seedeees (sammilit raksha seva) ki bhi taiyaari shuroo kar di. haalaanki vikram ko is dauraan Hongkong mein bhaari vetan mein marchent navy mein bhi naukri mil rahi thi, lekin desh seva ka sapana liye vikram ne is naukri ko thukara diya.

sena mein chayan

vigyaan vishay mein snaatak karne ke baad vikram ka chayan seedeees ke jariye sena mein ho gaya. July 1996 mein unhonne bhaarateeya sena academy deharaadoon mein pravesh liya. December 1997 mein shiksha samaapt hone par unhein 6 December 1997 ko Jammu ke sopor naamak sthaan par sena ki 13 Jammu-Kashmir rifles mein lieutenant ke pad par niyukti mili. unhonne 1999 mein commando training ke saath kai prashikshan bhi liye. pehli June 1999 ko unki tukadi ko Kargil yuddh mein bheja gaya. hamp va raaki naab sthaanon ko jeetne ke baad usi samay vikram ko captain bana diya gaya. iske baad shreenagar-leh maarg ke theek oopar sabse mahattvapoorn 5140 choti ko Pak sena se mukt karavaane ka jimma bhi captain vikram batra ko diya gaya. behad durgam kshetr hone ke baavajood vikram batra ne apne saathiyon ke saath 20 June 1999 ko subah teen bajkar 30 minute par is choti ko apne kabje mein le liya.

sherashaah ke naam se prasiddh

vikram batra ne jab is choti se radio ke jariye apna vijay udghosh 'yeh dil maange mor' kaha to sena hi naheen balki poore Bhaarat mein unka naam chha gaya. isi dauraan vikram ke code naam sherashaah ke saath hi unhein 'Kargil ka sher' ki bhi sanjnyaa de di gayi. agale din choti 5140 mein bhaarateeya jhande ke saath vikram batra aur unki team ka photo media mein aaya to har koi unka deevaana ho utha. iske baad sena ne choti 4875 ko bhi kabje mein lene ka abhiyaan shuroo kar diya. iski bhi baagdor vikram ko saunpi gayi. unhonne jaan ki paravaah na karte hue lieutenant anuj naiyar ke saath kai Pakistani sainikon ko maut ke ghaat utaara.

captain ke pita ji.L. batra kehte hain ki unke bete ke commanding officer lefteeneint Colonel vaaya.ke.Joshi ne vikram ko sher shaah upanaam se navaaja tha.

antim samay

mission lagbhag poora ho chuka tha jab captain apne kanishth adhikaari lefteeneint naveen ko bachaane ke liye lapke. ladaai ke dauraan ek visfot mein lefteeneint naveen ke donon pair buri tarah jakhmi ho gaye the. jab captain batra lefteeneint ko bachaane ke liye peechhe ghaseet rahe the tab unki ki chhaati mein goli lagi aur ve “ajaya maata dee” kehte huye veeragati ko praapt huye.

16 June ko captain ne apne judvaan bhaai vishaal ko draas sector se chitthi mein likha –“apriya kushu, maan aur pitaaji ka khyaal rakhana ... yahaaain kuchh bhi ho sakta hai.”

paramaveer chakr sammaan

adamya saahas aur paraakram ke liye captain vikram batra ko 15 August 1999 ko paramaveer chakr ke sammaan se navaaja gaya jo unke pita ji.L. batra ne praapt kiya. vikram batra ne 18 varsh ki aayu mein hi apne netr daan karne ka nirnaya le liya tha. vah netr bank ke card ko hamesha apne paas rakhate the.