vikipeediya:ullekhaneeyata

Nutshell.png is lekh ka saar: vikipeediya ke lekhon mein ullekhaneeya vishyon ko shaamil kiya jaata hai—aaunako jinhonein bade paimaane par samay ki avadhi mein duniya dvaara paryaapt mahatvapoorn dhyaan arjit kiya hai aur jo vikipeediya ke daayare se baahar naheen hain. ham is dhyaan ko naapane ke liye vishvasaneeya svatantr sroton ke saakshya par vichaar karte hai.

vikipeediya jaankaari ka andhaadhundh sangrah naheen hai. kuchh vishay vikipeediya ke liye upayukt naheen hain: aise vishyon par pej banaane ke liye niji website, blog aadi anukool hai.

vikipeediya ke ullekhaneeyata (notability) nirdesh yeh nirdhaarit karte hain ki koi vishay vikipeediya ke liye anukool hai ya naheen.

saamaanya ullekhaneeyata nirdesh

agar kisi vishay par svatantr aur vishvasaneeya srot upalabdh hai, jinmein is vishay ko mahatvapoorn ullekh mila hai to yeh vishay ek lekh ya soochi mein shaamil karne ke ullekhaneeyata maanadandon ko poora karta hai.

  • diye gaye vishay par vishvasaneeya truteeya paksh ke srot upalabdh hone chaahiyeain, athva yeh vishay vikipeediya ke hisaab se ullekhaneeya naheen maana jaata hai.
  • "mahattvapoorn ullekh" ka matlab hai ki sootron mein is vishay par vistaar se charcha ki ho. yeh ek tuchh ullekh ki tulana mein adhik hona chaahiye, lekin yeh zaroori naheen ki vichaaraadheen vishay srot saamagri ka mukhya vishay hi ho.
  • vishvasaneeya sroton mein sampaadkeeya akhandata hoti hai, aur inka nireekshan kiya jaana sambhav hota hai. kisi bhi srot ki vishvasaneeyata aksar sandarbh par nirbhar karti hai.
  • srot: ullekhaneeyata ke nirdhaaran ke uddeshya ke liye srot vishay se svatantr hone chaahiyeain. vishvasaneeya sroton ki jaroori sankhya sroton ki prakruti/gunavatta aur ullekh ki gaharaai par nirbhar karti hai. aam taur par ek se zyaada sroton ki ummeed ki jaati hai. ek hi lekhak ya ek hi sangathan ke ek se adhik prakaashanon ko ullekhaneeyata ke nirdhaaran ke uddeshya ke liye ek hi srot ke roop mein maana jaata hai.
  • svatantr srot ve hote hain jo vishay se sambandhit logon dvaara utpann naheen kiye gaye hain. svatantr sroto mein aatm-prachaar, vigyaapan vishay, aatmakatha, press vigyapti, swayam-prakaashit saamagri aadi shaamil naheen hain.

nihit ullekhaneeyata

kuchh vishay nihit roop se ullekhaneeya maane jaate hain, jaise:

  • sarkaar-maanya desh, raajya, shahar, tahaseel, gram, aadi sthaan
  • taare, grah aadi
  • jeevon ki prajaatiyaaain (jaise ghongha, masharoom aadi)

yeh not karein ki vikipeediya par lekh banaane ke liye aisi cheejon ke astitv ko saabit karna zaroori hai. aap yeh naheen kah sakte ki "damadamabamabamapur ek shahar hai. main is sthaan par ek lekh banaaoongi - pleej is pej ko dileet na karein". "damadamabamabamapur" naam ka sachmuch mein koi shahar hai, yeh saabit karna pej banaane vaale ki jimmedaari hai.

udaaharan

anullekhaneeya vishay

  • "mera kutta Tommy": maan leejiye ki Tommy aapka kutta hai jisne ek-do sthaaneeya daug-sho jeet liye hain. iske baare mein aapke padosi aur rishtedaar to kaafi kuchh jaante hain, parantu baaki logon mein yeh zyaada prasiddh naheen hain. yaani ki is Tommy par aise svatantr aur vishvasaneeya srot upalabdh naheen hai, jin mein ise mahatvapoorn ullekh mila hai. vikipeediya ke liye Tommy anullekhaneeya hai. aapka blog aur aapka fesabuk pej Tommy ke baare mein likhne ke liye ek behtar sthaan hain.
  • "kavi pantar Singh": kavi pantar Singh ek chhote-mote sthaneeya kavi hain, jinhein do-teen chhote-mote puraskaar mil chuke hain (jaise national college ka sarvottam kavi evaard 2006 aur jhumari talaiya ratn sammaan). parantu inhein abhi tak zyaada prasiddhi haasil naheen hui hai: ye muhalle mein mashhoor hain, 2-3 patrikaaon ke paathakon ne inka naam suna hai aur inki blog par kuchh logo ne inki kavitaaon ki vaah-vaah ki hai. sthaaneeya TV channel aur aakaashavaani par prasaarit kavi-sammelanon mein bhi ye dekhe aur sune gaye hain. parantu inke chhote se daayare ke baahar inhein shaayad hi koi jaanta hai. inki ek pustak sthaaneeya "raamoo-shyaamoo prakaashan" dvaara nikaali gayi hai. pustak ke baik-kavar par likha hai: "kavi pantar Singh Bhaarat ke sabse pramukh kaviyon mein se ek hain." yeh srot vishay se svatantr naheen hain - yeh to pantar bhaai ki khud ki pustak kah rahi hai. agar raashtreeya-star ki 3-4 patrikaaon/akhbaaron mein ya yeh likha hota to alag baat thi. filhaal, vikipeediya ke liye pantar ji ullekhaneeya naheen hai. ham aasha karte hain ki kisi din inhein koi bada puraskaar aur kaafi shoharat mile -- us din hi ham vikipeediya par inke baare mein likheinge.
  • abhinetri chutki kumaari: chutki ji ne kuchh sthaaneeya naatakon mein kaam kiya hai, aur ek-do filmon mein bhi inhein 'ekstra' ke roop mein kaam diya gaya hai. muhalle ke hi naheen balki saare baranaula ke chhore inki khoobsoorti aur nrutya pratibha par fida hain. ek chhoti-si sthaaneeya college patrika ne ek lekh mein inhein 'baranola ki maadhuri Dixit' kaha hai. ek baar ek mukhya akhbaar mein khabar chhapi thee: "national college ke chhaatron ne raashtreeya vidyaarthi drama mukaabala jeeta". is khabar mein chutki ke baare mein bhi ek-do vaakya chhape the. ek blog ka kehna hai ki "chutki kumaari duniya ke sabse mahaan kalaakaaron me jaani jaati hain. enjeleena joli, nikol kidmain aur Aishwarya rai ke shreni mein aane waali is kalaakaar ke vishvabhar mein hajaaron prashansak hain." sthaaneeya patrika ko badi gunavatta wala srot naheen kaha ja sakta hai -- agar vibhinn kshetron ki kai saari sthaaneeya patrikaaon ne yahi chhaapa hota to alag baat thi. akhbaar mein chhapi khabar mein chutki ji ka jo ullekh kiya gaya hai, vah tuchh hai -- ise ham "mahattvapoorn ullekh" naheen maan sakte. blog ko ham vishvasaneeya srot naheen maan sakte. arthaat, abhinetri chutki kumaari vikipeediya ke liye is samay ullekhaneeya naheen hai. kisi din agar ye sachmuch suprasiddh abhinetri ban gain to hamein inke baare mein lekh likhne mein bahut khushi hogi.