vaakaatak

nandivrdhan durg ke bhagnaavashesh

vaakaatak shabd ka prayog praacheen Bhaarat ke ek raajavansh ke liye kiya jaata hai jisne teesari sadi ke madhya se chhathi sadi tak shaasan kiya tha. us vansh ko is naam se kyon sambandhit kiya gaya, is prashn ka sahi uttar dena kathin hai. syaat‌ vakaat naam ka madhyabhaarat mein koi sthaan raha ho, jahaaain par shaasan karanevaala vansh vaakaatak kahalaaya. ataev pratham raaja ko ajanta lekh mein "vaakaatak vanshaketu:" kaha gaya hai. is raajavansh ka shaasan Madhya Pradesh ke adhik bhoobhaag tatha praacheen baraar (Andhra pradesh) par vistrut tha, jiske sarvapratham shaasak vindhyashakti ka naam vaayupuraan tatha ajantaalekh me milta hai. sambhavat: vindhya parvateeya bhaag par shaasan karne ke kaaran pratham raaja 'vindhyashakti' ki padavi se vibhooshit kiya gaya. is naresh ka praamaanik itivrutt upasthit karna kathin hai, kyonki vindhyashakti ka koi abhilekh ya sikka abhi tak upalabdh naheen ho saka. teesari sadi ke madhya mein saatavaahan raajya ki avanati ho jaane se vindhyashakti ko avsar mil gaya to bhi usaka yash sthaayi na rah saka. uske putr pratham pravarasen ne vansh ki pratishtha ko amar bana diya. abhilekhon ke adhyayan se pata chalta hai ki pratham pravarasen ne dakshin mein raajyavistaar ke upalaksh mein chaar ashvamedh kiye aur samraat ki padavi dhaaran ki.

pravarasen ke samakaaleen shaktishaali naresh ke abhaav mein vaakaatak raajya Andhra Pradesh tatha madhyabhaarat mein vistrut ho gaya. baghelakhand ke adheenasth shaasak vyaaghraraaj ka ullekh samudragupt ke stanbhalekh mein bhi aaya hai. sambhavat: pravarasen ne chauthi sadi ke pratham charan mein poorvadakshin Bhaarat, maalava, Gujarat, kaathiyaavaad par adhikaar kar liya tha parantu iski pushti ke liye sabal pramaan naheen milte. yeh to nishchit hai ki pravarasen ka prabhaav dakshin mein tak fail gaya tha. parantu kitne bhaag par vah seedha shaasan karta raha, yeh spasht naheen hai. yeh kehna sarvatha uchit hoga ki vaakaatak raajya ko saamraajya ke roop mein parint karna usi ka kaarya tha. pratham pravarasen ne vaidik yajnyaon se iski pushti ki hai. chauthi sadi ke madhya mein usaka pautr pratham rudrasen raajya ka uttaraadhikaari hua, kyonki pravarasen ka jyeshth putr gotameeputr pehle hi mar chuka tha.

maanasar mein pravarasen dviteeya dvaara nirmit pravareshvar Shiv mandir ke bhagnaavashesh

vaakaatak vansh ke teesare shaasak mahaaraaj rudrasen pratham ka itihaas atyant vivaadaaspad maana jaata hai. praarambh mein vah aapattiyon tatha nirbalata ke kaaran apni sthiti ko sabal na bana saka. kuchh vidvaan‌ yeh maanate hain ki uske pitruvya saamraajya ko vibhaajit kar shaasan karna chaahate the, kintu pitruvya sarvasen ke atirikt kisi ka vruttaant praapya naheen hai. vaakaatak raajya ke dakshin-pashchim bhaag mein sarvasen ne apna prabhutv sthaapit kar liya tha jahaaain (baraar tatha Andhra pradesh ka uttari-pashchimi bhoobhaag) uske vanshaj paaainchavi sadi tak raajya karte rahe. is prasang mein yeh maan lena sahi hoga ki uske naana bhaarashiv mahaaraaj bhavanaag ne rudrasen pratham ki visham paristhiti mein sahaayata ki, jiske falasvaroop rudrasen apni satta ko drudh kar saka. (chanpak taamrapatr ka. i., i. bha. 3, pru. 226) is vaakaatak raaja ke vinaash ke sambandh mein kuchh logon ki asatya dhaaran bani hui hai ki guptavansh ke utthaan se rudrasen pratham nasht ho gaya. gupt samraat samudragupt ne kaushaanbi ke yuddh mein vaakaatak naresh rudrasen pratham ko maar daala (a. bh. O. ri. i., bha. 4, pru. 30-40, athva uttari Bhaarat ki digvijya mein use shreehat kar diya. is kathan ki praamaanikta samudragupt ki prayaagaprashasti mein ullikhit paraajit naresh rudradev se siddh karte hain. prashasti ke vishleshan se yeh sameekaran kadaapi yuktiyukt naheen hai ki rudradev tatha vaakaatak mahaaraaj pratham rudrasen ek hi vyakti the. vaakaatakanaresh se samudragupt ka kaheen saamana na ho saka. ataev paraajit ya shreehat hone ka prashn hi naheen uthata. iske vipreet yeh kehna uchit hoga ki gupt samraat ne vaakaatak vansh se maitri kar li. vaakaatak abhilekhon ke aadhaar par yeh vichaar vyakt karna satya hai ki is vansh ki shri kai peedhiyon tak akshunn bani rahi. kosh, sena tatha pratishtha ki abhivruddhi pichhle sau varshon se hoti rahi (maanakosh dand saadhanasantaan putr pautrin : A. i., bha. 3, pru. 261) iske putr pruthveeshen pratham ne kuntal par vijay kar dakshin Bhaarat mein vaakaatak vansh ko shaktishaali banaaya. uske mahatvapoorn sthaan ke kaaran hi gupt samraat dviteeya chandragupt ko (E. s. 380 ke sameep) apni putri ka vivaah Yuvraj rudrasen se karna pada tha. is vaivaahik sambandh ke kaaran gupt prabhaav dakshin Bhaarat mein atyadhik ho gaya. falat: dviteeya rudrasen ne sinhaasanaaroodh hone par apne shvasur ka kathiyaavaad vijay ke abhiyaan mein saath diya tha.

dviteeya rudrasen ki akaal mrutyu ke kaaran usaki patni prabhaavati gupta apraaptavayask putron ki sanrakshika ke roop mein shaasan karne lagi. vaakaatak shaasan ka shubhachintak bankar dviteeya chandragupt ne sakriya sahayog bhi diya. paataliputr se sahakaari karmachaari niyukt kiye gaye. yahi kaaran tha ki prabhaavati gupta ke poonaataamrapatr mein guptavanshaavali hi ullikhit hui hai. kaalaantar mein Yuvraj daamodarasen dviteeya pravarasen ke naam se sinhaasan par baitha, kintu is vansh ke lekh yeh batalaate hain ki pravarasen se dviteeya pruthveeshen paryant kisi prakaar ka ran abhiyaan na ho saka. paaainchavi sadi ke ant mein raajasatta veneemashaakha (sarvasen ke vanshaj) ke shaasak harishen ke haath mein gayi, jise ajanta lekh mein kuntal, avanti, laat, koshal, kaling tatha Andhra deshon ka vijeta kaha gaya hai (Indian kalchar, bha. 7, pru. 372) use uttaraadhikaariyon ki nirbalata ke kaaran vaakaatak vansh vinsht ho gaya.

ajanta gufaaon mein shail ko kaatkar nirmit bauddh Bihar evam chaitya vaakaatak saamraajya ke vatsagulm shaakha ke raajaaon ke sanrakshan mein bane the.

abhilekhon ke adhyayan se gyaat hota hai ki dakshin Bhaarat mein vaakaatak raajya vaibhavashaali, sabal tatha gauravapoorn raha hai. saanskrutik utthaan mein bhi is vansh ne haath bataaya tha. praakrut kaavyon mein "setubandh" tatha "harivijya kaavya" kramash: pravarasen dviteeya aur sarvasen ki rachana maane jaate hain. vaise praakrut kaavya tatha subhaashit ko "vaidarbhi shaili" ka naam diya gaya hai. vaakaatakanaresh vaidik dharm ke anuyaayi the, iseeliye anek yajnyaon ka vivran lekhon mein milta hai. kala ke kshetr mein bhi iska kaarya prashansaneeya raha hai. ajanta ki chitrakala ko vaakaatak kaal mein adhik protsaahan mila, jo sansaar mein adviteeya bhittichitr maana gaya hai. naachana ka mandir bhi isi yug mein nirmit hua aur usi vaastukala ka anukaran kar udayagiri, devagadh evam ajanta mein guhaanirmaan hua tha. samast vishyon ke anusheelan se pata chalta hai ki vaakaatak nareshon ne raajya ki apeksha saanskrutik utthaan mein vishesh anuraag pradarshit kiya. yahi is vash ki visheshata hai.

shaasak

  • vindhyashakti (250-270)
  • pravarasen pratham (270-330)
pravarapur-nandivrdhan shaakha
  • rudrasen pratham (330-355)
  • pruthveesen pratham (355-380)
  • rudrasen dviteeya (380-385)
  • prabhaavateegupta (385-405)
  • divaakarasen (385–400)
  • daamodarasen (pravarasen dviteeya) (400-440)
  • narendrasen (440-460)
  • pruthveesen dviteeya (460-480)
vatsagulm shaakha
  • sarvasen truteeya (330–355)
  • vindhyasen (vindhyashakti dviteeya) (355–400)
  • pravarasen dviteeya (400–415)
  • agyaat (415–450)
  • devasen (450–475)
  • harisen (475–500)

baahari kadiyaaain