solanki vansh

teen shatak se bhi jyaada samay tak solanki shaasakon ne vadanagar ke itihaas mein mahattvapoorn bhoomika ada ki. san 942 mein moolaraaj ne Gujarat mein rajput solanki vansh ki sthaapana ki thi aur usi ne maalava ke shaasakon ko vadanagar ke aaspaas ke pradesh se khaded diya. maalava ke shaasakon ne yeh nagar ka bharpoor shoshan kiya tha aur usaki vajah se vah apni chamak-damak kho baitha tha. moolaraaj solanki bahut saksham shaasak tha. usane san 942 se 995 tak ki 53 varsh jitni lambi avadhi tak raaj kiya aur Gujarat ko sthirta tatha aabaadi pradaan ki. us ke shaasan ke saath hi Gujarat ki rajdhani paatan ke leee hi naheen, lekin vadanagar ke liye bhi suvarnakaal ki shuruaat hui.

nagar mein bahut saare naye mandir banaaye gaye aur puraane mandiron ka pun:nirmaan kiya gaya. sharmishtha ke dakshini kinaare par ek suaayojit baajaar ne aakaar liya. pattharon se dhake pakke raaste banaaye gaye. nagar ko anya pradeshon se judate raaston ke kinaare yaatrikon ke liye kuen aur vaavon ka nirmaan kiya gaya gaya.

aaj vadanagar mein jitne bhi shilp najar aate hain, un mein se bahutere solanki yug mein bane.

vadanagar ka saanskrutik evam aarthik moolya samajhte hue solanki naresh kumaarapaal ne san 1152 mein nagar ke kile ka pun:nirmaan kar ke use aur bhi majaboot banaaya. lagbhag terahavein shatak ke ant tak yeh nagar solankeeon ke shaasan tale achhi tarah surakshit raha aur is ke vyaapaar-udyog fale-foole. san 1297 mein dilhi salatanat ne Gujarat jeet liya. sulataan ke lashkar ne vadanagar par hamla kiya, use loota, jalaaya aur us ke pramukh naagrikon ko katl kiya. majhaboot kila koi kaam na aaya, kyonki usaka rakshan karanevaala koi sainya vahaan tha hi naheen.

solanki yug me bahot saktisaali or buddhisaali raaja ho gaye hai. mularaaj, bheemadev, karnadev, siddharaaj jayasinh, kumaarapaal jaise itihaas prasiddh vir raaja ho gaye hai. siddharaaj jayasinh ne baabara par vijay praapt karke "barbarak jishnu"ka birud praapt kiya. unhone maalava par vijay praapt karke "avantinaath"ka birud bhi praapt kiya.

mahaaraaj kumaarapaal ne pure Gujarat me maansaahaar par pratibndh kar diya tha . vo chhote jeev ka bhi katl nahi hone dete the . unhone jain dharm ko raajyadharm banaaya tha. mahaaraaj bheemadev ko "baanaavali bheemadev" ke naam se jaana jaata tha . vo lohe ke 7 tavon kon ek hi teer se chir dete the . unhone modhera mein "sooryadev" ka mandir nirmaan kiya tha . unhone "somanaath"ke mandir ka jirnoddhaar kiya tha . bheemadev aur hammeerasinh ne mohamad gajani ko Rajasthan mein mandiron ki loot ka maal le jaane se roka tha aur maal vaapas somanaath mandir mein lekar gaye the .