siyaaraamasharan gupt

siyaaraamasharan gupt (4 September 1895 - 29 March 1963) (bhaadr poornima samvat 1952 vikrami) hindi ke saahityakaar the.

anukram

jeevani

siyaaraamasharan gupt ka seth raamacharan kanakane ke parivaar mein shri maithileesharan gupt ke anuj rup mein chirgaaainv, Jhansi mein hua tha. praarambhik shiksha poori karne ke baad unhonne ghar mein hi gujaraati, angreji aur urdoo bhaasha seekhi. san 1929 E. mein raashtrapita mahaatma Gandhi aur kastooraba gaaaindhi ke sampark mein aaye. kuchh samay vardha aashram mein bhi rahe. san 1940 mein chirgaanv mein netaaji subhaashachandr Bose ka svaagat kiya. ve sant vinoba bhaave ke sampark mein bhi aaye. unki patni tatha putron ka nidhan asamaya hi ho gaya tha at: ve du:kh vedana aur karuna ke kavi ban gaye. 1914 mein unhonne apni pehli rachana maurya vijay likhi.[1]

saahitya seva

chirgaaainv (jhaaainsi) mein baalyaavastha beetane ke kaaran bundelakhand ki veerata aur prakruti Sushma ke prati aapka prem svabhaavagat tha. ghar ke vaishnav sanskaaron aur gaandheevaad se gupt ji ka vyaktitv viksit hua. gupt ji swayam shikshit kavi the. maithileesharan gupt ki kaavyakala aur unka yugabodh siyaaraamasharan ne yathaavat‌ apnaaya tha. at: unke sabhi kaavya Dwivedi yugeen abhidhaavaadi kalaaroop par hi aadhaarit hain. donon gupt bandhuon ne hindi ke naveen aandolan chhaayaavaad se prabhaavit hokar bhi apna itivruttaatmak abhighaavaadi kaavya roop surakshit rakha hai. vichaar ki drushti se bhi siyaaraamasharan ji jyeshth bandhu ke sadrush gaandheevaad ki paradu:khakaatarata, raashtraprem, vishvaprem, vishv shaanti, hrudaya parivrtanavaad, satya aur ahinsa se aajeevan prabhaavit rahe. unke kaavya vastut: Gandhivadi nishta ke saakshaatkaarak padyabaddh prayatn hain.

gupt ji ke maurya vijay (1914 E.), anaath (1917), doorvaadal (1915-24), vishaad (1925), aardra (1927), aatmotsarg (1931), mrunmayi (1936), Bapu (1937), unmukt (1940), dainiki (1942), nakul (1946), noaakhaali (1946), geetaasanvaad (1948) aadi kaavyon mein maurya vijay aur nakul aakhyaanaatmak hain. shesh mein bhi katha ka sootr kisi na kisi roop mein dikhaai padta hai. maanav prem ke kaaran kavi ka niji du:kh, saamaajik du:kh ke saath ekaakaar hota hua varnit hua hai. vishaad mein kavi ne apne vidhur jeevan aur aardra mein apni putri rama ki mrutyu se utpann vedana ke varnan mein jo bhaavodgaar prakat kiye hain, ve Bachchan ke priyaaviyog aur niraala ji ki "sarojasmruti' ke samaan kalaapoorn na hokar bhi kam maarmik naheen hain. isi prakaar apne hrudaya ki sachaai ke kaaran gupt ji dvaara varnit janta ki daridrata, kureetiyon ke viruddh aakrosh, vishv shaanti jaise vishyon par unki rachanaaeain kisi bhi pragativaadi kavi ko paath padha sakti hain. hindi mein shuddh saatvik bhaavodgaaron ke liye gupt ji ki rachanaaeain smaraneeya raheingi. unamein jeevan ke shrrungaar aur ugr pakshon ka chitran naheen ho saka kintu jeevan ke prati karuna ka bhaav jis sahaj aur pratyaksh vidhi par gupt ji mein vyakt hua hai usase unka hindi kaavya mein ek vishisht sthaan ban gaya hai. hindi ki Gandhivadi raashtreeya dhaara ke vah pratinidhi kavi hain.

kaavya roopon ki drushti se unmukt nrutya naatya ke atirikt unhonne punya parv naatak (1932), jhootha sach nibandh sangrah (1937), god, aakaanksha aur naari upanyaas tatha laghukathaaon (maanushi) ki bhi rachana ki thi. unke gadya saahitya mein bhi unka maanav prem hi vyakt hua hai. katha saahitya ki shilp vidhi mein naveenata na hone par bhi naari aur dalit varg ke prati unka dayaabhaav dekhte hi banta hai. samaaj ki samast asangatiyon ke prati is vaishnav kavi ne kaheen samjhauta naheen kiya kintu unka samaadhaan sarvatr Gandhi ji ki tarah unhonne varg sangharsh ke aadhaar par na karke hrudaya parivartan dvaara hi kiya hai, at: "god' mein shobhaaraam mithya kalank ki chinta na kar upekshit kishori ko apna leta hai; "antim aakaanksha' mein raamalaal apne maalik ke liye sarvasv tyaag karta hai aur "naari' ke jamuna akele hi vipttipth par adig bhaav se chalti rahati hai. gupt ji ki maanushi, kasht ka pratidaan, chukkhoo pret ka palaayan, raamaleela aadi kathaaon mein peedit ke prati samvedna jagaane ka prayatn hi adhik milta hai. jaati varn, dal varg se pare shuddh maanavataavaad hi unka kathya hai. vastut: anek kaavya bhi padyabaddh kathaaeain hi hain aur gadya aur padya mein ek hi ukt mantavya vyakt hua hai. gupt ji ke padya mein naatakeeyata tatha kaushal ka abhaav hone par bhi santon jaisi nishhalata aur sankulata ka aprayog unke saahitya ko aadhunik saahitya ke tumul kolaahal mein shaant, sthir, saatvik ghrutapeed ka gaurav deta hai jo hrudaya ki pashuta ke andhakaar ko door karne ke liye apni jyoti mein aatm magn evam nishkanp bhaav se sthit hai.

pramukh rachanaaeain

  • khand kaavya

, aardra, vishaad, doorva dal, Bapu, sunanda aur gopika.

  • maanushi --kahaani sangrah
  • punya parv --naatak
  • anuvaad- geeta samvaad
  • naatya- unmukt geet
  • kavita sangrah- anurupa tatha amrut putr
  • kaavyagranth- dainiki nakul, noaakhali mein, jaya hind, paatheya, mrunmayi tatha aatmosarg.
  • upanyaas- antim aakaanksha tatha naari aur god.
  • nibndh sangrah- jhooth-sach.
  • padyaanuvaad- ishopanishd, dhammapad aur bhagavat geeta

sammaan

unhein deerghakaaleen saahitya sevaaon ke liye san 1962 mein 'sarasvati heerak jayanti' ke avsar par sammaanit kiya gaya. 1941 mein unhein naagari prachaarini sabha Varanasi dvaara "sudhaakar padak' pradaan kiya gaya. aapki samast rachanaaen paanch khandon mein sankalit kar prakaashit hai.

lambi beemaari ke baad 9 March 1963 E. ko unka nidhan ho gaya.

inhein bhi dekhein

sandarbh