shankaraachaarya

shankaraachaarya aam taur par advait parampara ke mathon ke mukhiya ke liye prayog ki jaane waali upaadhi hai. shankaraachaarya hindu dharm mein sarvochch dharm guru ka pad hai jo ki bauddh dharm mein dalaailaama evam isaai dharm mein Pope ke samakaksh hai. is pad ki parampara aadi guru shankaraachaarya ne aarambh ki. yeh upaadhi aadi shankaraachaarya, jo ki ek hindu daarshanik evam dharmaguru the evam jinhein hindutv ke sabse mahaan pratinidhiyon mein se ek ke taur par jaana jaata hai, ke naam par hai. unhein jagadguru ke taur par sammaan praapt hai ek upaadhi jo ki pehle keval Bhagwan Krishna ko hi praapt thi. unhonne sanaatan dharm ki pratishtha hetu Bhaarat ke chaar kshetron mein chaar math sthaapit kiye tatha shankaraachaarya pad ki sthaapana karke un par apne chaar pramukh shishyon ko aaseen kiya. tabase in chaaron mathon mein shankaraachaarya pad ki parampara chali aa rahi hai.

chaar math nimnalikhit hain:

  • uttaraamanya math ya uttar math, jyotirmath jo ki josheemath mein sthit hai.
  • poorvaamanya math ya poorvi math, govardhan math jo ki puri mein sthit hai.
  • dakshinaamanya math ya dakshini math, shrungeri shaarada peeth jo ki shrungeri mein sthit hai.
  • pashchimaamanya math ya pashchimi math, dvaarika peeth jo ki dvaarika mein sthit hai.

in chaar mathon ke atirikt bhi Bhaarat mein kai anya jagah shankaraachaarya pad lagaane vaale math milte hain. yeh is prakaar hua ki kuchh shankaraachaaryon ke shishyon ne apne math sthaapit kar liye evam apne naam ke aage bhi shankaraachaarya upaadhi lagaane lage. parantu asli shankaraachaarya uparokt chaaron mathon par aaseen ko hi maana jaata hai.

inhein bhi dekhein