shakti (devi)

durga ke roop mein shakti

shakti, ishvar ki vah kalpit maaya hai jo usaki aajnyaa se sab kaam karanevaali aur srushtirchana karanevaali maani jaati hai. yeh anantaroopa aur anantasaamarthyasanpanna kahi gayi hai. yahi shakti jagatroop mein vyakt hoti hai aur pralayakaal mein samagr charaachar jagat ko apne mein vileen karke avyaktaroopen sthit rahati hai. yeh jagat vastut: usaki vyavastha ka hi naam hai.

geeta mein varnit yogamaaya yahi shakti hai jo vyakt aur avyakt roop mein hain. Krishna 'yogamaayaamuvaashrit:' hokar hi apni laala karte hain. raadha unki aahvaadini shakti hai. Shiv shaktiheen hokar kuchh naheen kar sakte. shaktiyukt Shiv hi sab kuchh karne mein, na karne mein, anyatha karne mein samarth hote hain. is tarah bhaarateeya darshanon mein kisi na kisi naam roop se iski charcha hai. puraanon mein vibhinn devataaon ki vibhinn shaktiyon ki kalpana ki gayi hai. in shaktiyon ko bahudha devi ke roop mein aur moortimti maana gaya hai. jaise, vishnu ki keerti, kaanti, tushti, pushti aadi; rudr ki gunodari, gomukhi, deerghajihva, jvaalaamukhi aadi. maarkandeyapuraan ke anusaar samast devataaon ki tejoraashi devi shakti ke roop mein kahi gayi hai jiski shakti vaishnavi, maaheshvari, brahmaani, kaumaari, naarasinhi, indraani, vaaraahi aadi hain. un devon ke svaroop aur gunaadi se yukt inka varnan praapt hota hai.

tantr ke anusaar kisi peeth ki adhishthaatri devi shakti ke roop mein kahi gayi hai, jiski upaasana ki jaati hai. iske upaasak shaakt kahe jaate hain. yeh shakti bhi srushti ki rachana karanevaali aur poorn saamarthyasanpann kahi gayi hai. bauddh, jain aadi sanpradaayon ke tantrashaastron mein shakti ki kalpana ki gayi hai, inhein bauddhaabharya bhi kaha gaya hai. taantrikon ki paribhaasha mein yuvati, roopavati, saubhaagyavati vibhinn jaati ki striyon ko bhi is naam se kaha gaya hai aur vidhipoorvak inka poojan siddhiprad maana gaya hai.

prabhu, mantra aur utsaah naam se raajaaon ki teen shaktiyaaain kahi gayi hain. kosh aur dand aadi se sambandhit shakti prabhushakti, sandhivigrah aadi se sambandhit mantrashakti aur vijay praapt karne sambandhi shakti ko utsaah shakti kaha gaya. raajyashaasan ki sudrudhta ke nimitt inka hona aavashyak kaha gaya hai.

shabd ke antarnihit arth ko vyakt karne ka vyaapaar shabdashakti naam se abhihit hai. ye vyaapaar teen kahe gaye hain - abhidha, lakshana aur vyanjana. aachaaryon ne ise shakti aur vrutti naam se kaha hai. ghat ke nirmaan mein mitti, chakr, dand, kulaal aadi kaaran hai aur chakr ka ghoomana shakti ya vyaapaar hai aur abhidha, lakshana aadi vyaapaar shaktiyaaain hain. mammat ne vyaapaar shabd ka prayog kiya hai to vishvanaath ne shakti ka. 'shakti' mein ishvarechha ke roop mein shabd ke nishchit arth ke sanket ko maana gaya hai. yeh praacheen tarkashaastriyon ka mat hai. baad mein 'ichhaamaatr' ko 'shakti' maana gaya, arthaat manushya ki ichha se bhi shabdon ke arthasanket ki parampara ko maana. 'tarkadeepika' mein shakti ko shabd arth ke us sambandh ke roop mein sveekaar kiya gaya hai jo maanas mein arth ko vyakt karta hai.

inhein bhi dekhein