sankraamak rog

sankraamak rog, rog jo kisi na kisi rogajanit kaarako (rogaanuon) jaise protojoaa, kavak, jeevaanu, vaairas ityaadi ke kaaran hote hai. sankraamak rogon me ek shareer se anya shareer mein failane ki kshamata hoti hai. maleriya, taayafaayad, chechak, influenja ityaadi sankraamak rogon ke udaaharan hain.

vishv svaasthya sangathan ki drushti

vishv svaasthya sangathan ne kaha hai ki duniya bhar mein sankraamak rog pehle se kaheen jyaada teji se fail rahe hain aur unka ilaaj karna jyaada mushkil ho gaya hai. apni vaarshik vishv svaasthya report 2008 mein raashtra sangh agency ne kaha hai ki 1970 ke dashak se har saal ek ya jyaada nae rogon ka pata chal raha hai, jo abhootapoorv hai. agency ne kaha hai ki tapedik jaisi jaani-maani beemaariyon ko niyantrit karne ke prayaas bhi seemit ho rahe hain, kyonki ve jyaada taakatavar aur davaaiyon ki pratirodhi kismon mein viksit hoti ja rahi hain.

vishv svaasthya sangathan ne kaha hai ki sankraamak rogon ke prasaar ka kaaran pichhle 50 varshon mein antarraashtreeya havaai yaataayaat mein vruddhi hai. usane pichhle 5 varshon mein hi 1,100 se jyaada vibhinn beemaariyaan failane ki pushti ki hai. vishv svaasthya sangathan ne apne 193 sadasyon ko beemaariyon ke failane ke baare mein jaankaari dene aur teeke viksit karne mein madad dene ke liye vishaanuon ke namoonon ka aadaan-pradaan karne me ek-doosare ke saath jyaada sahayog karne ka anurodh kiya hai.

niraakaran

teekon ke jariye rogon ka samay poorv mukaabala karna aur unhein niyantr mein rakhana maanav dvaara rogon ke ilaaj mein praapt prashansaneeya pragati hai. vishv svaasthya sangathan dvaara prakaashit ek report ke anusaar abh bhi vishv mein har saal laakhon bachche sankraamak rogon ke shikaar ho rahe hain, lekin un mein se bees lakh ko teekon ke jariye bachaaya ja sakta tha. hamein sarvapratham yeh jaanana chaahiye ki teeka kya hai. cheen ke rajdhani shahar peiching ke rog nirodh kendra ke visheshagya shri voo chyaang ke anusaar teeka vaastav mein kisi vishaanu ki processing ke aadhaar par viksit kiya gaya utpaad hota hai. ise khaane ya sui ke jariye maanav shareer mein pravisht karaane se maanav shareer mein asli vishaanuon ka mukaabala karne ki shakti paida ki jaati hai. teeka vishaanu se bilkul alag hai, kyonki vishaanu lagne se rog paida hota hai, par teeke ke jariye shareer mein rog ka mukaabala karne ki shakti paida hoti hai.

varsh 1796 mein ek british daaktar maanav shareer mein gaaya mein hone vaale ek rog ke chechak jaise vishaanu kaubauks ko pravisht karaane ke jariye chechak ka ilaaj karne mein safal raha tha. is tarah maanav ne chechak ke teeke ka aavishkaar kiya. varsh 1980 mein vishv chikitsa sangathan ne chechak ki samaapti ki ghoshana ki, jo rog pratirkshan kshamata ke jariye khatm kiya jaane wala pratham rog tha. us ke baad maanav ne lambe arase ke prayaason se anek rogon, jaise chechak, pleg, kaali khaansi, rohini, hanustanbh, khasare aur paagal kutte ke rog ke teekon ka utpaadan karne ki kshamata haasil ki. sankraamak rogon ke mukaabale mein teekon ki vishesh bhoomika ki vajah se vibhinn deshon mein teeka lagaane ko bahut mahatva diya jaata hai. cheen mein bhi yeh kaarya bahut pehle shuroo ho gaya tha. idhar teji se saamaajik va aarthik vikaas karte cheen mein teeka lagaane ko adhikaadhik mahatva diya ja raha hai aur bachchon ko teeka lagaane ke kaarya ko vishesh mahatva praapt hai.

cheen mein rog pratirkshan kshamata badhaane ka kaam yojanaanusaar kiya jaata hai. cheen mein saat varsh se kam umr ke sabhi bachchon ko poliyo, khasare, peeliya, tapedik, kaali khaansi aur rohini aadi rogon ke teeke lagaaye jaate hain. iska mukhya kharch sarkaar uthaati hai. bachchon ke maan-baap ka is par bahut kam kharch aata hai. 1970 ke dashak se cheen mein yeh kaam shuroo hone ke baad se bhaari pragati hui hai. isse cheeni bachchon ki rog pratirkshan kshamata bahut unnat ho gayi. cheeni baalarog visheshagya daaktar hoo yaamei ke anusaar varsh 2003 mein jab cheen saars se grast hua, tab bhi cheen mein koi bhi bachcha is rog ka shikaar naheen bana. visheshagyon ka maanana hai ki cheeni bachchon ko khasare ka teeka lagaaye jaane se unamein saars ka mukaabala karne ki shakti paida hui. iseeliye bahut kam cheeni bachche 2003 mein saars ke shikaar hue. saars ki vajah se kisi kisi bachche ki mrutyu bhi naheen hui.

pata chala hai ki 15 saal pehle hi cheen ne apne 15 pratishat bachchon ko teeka lagaane ka lakshya poora kar liya tha. sanyukt raashtra baal kosh, vishv chikitsa sangathan aur cheeni svaasthya mantraalaya ne is kaarya ki sanyukt jaanch ki aur is ka uchch moolyaankan kiya. teekon se cheen mein khasare aadi sankraamak rogon mein bahut kami I hai. misaal ke liye 1960 ke dashak mein isse hone waali mrutyu ki dar prati lakh 2000 se ghatkar 10 tak gir gayi. cheen varsh 1960 mein chechak ka khaatma kar chuka tha aur varsh 2000 mein usane poliyo ka naash karne ke yuddh mein vijay pai. cheen sarkaar dvaara bachchon ke liye tay paanch aavashyak teekon ke atirikt cheeni logon ko apne bachchon ko aspataalon mein apne kharch par flu aur peeliya aadi rogon ka teeka lagavaane ki suvidha bhi haasil hai. bachchon ke alaava praudh log bhi vibhinn mausamon mein utpann hone vaale sankraamak rogon ki rokathaam ke liye aspataal mein aavashyak teeke lagava sakte hain. yahaan yeh bhi charchit hai ki cheen mein kutte bhi khaase jyaada hain, isliye logon ko paagal kutte ke rog ka teeka lagaane ki bhi jaroorat hai.

naye sankraamak rogon ka mukaabala karne ke liye ab cheeni visheshagya naye teekon ka anusandhaan kar rahe hain. cheeni rog nirodh society ke visheshagya daaktar ho shyoong ka kehna hai ki cheeni visheshagya kai naye teekon ke aavishkaar mein lage hain. teekon ke jariye eds, Cancer aur kuchh puraane gambhir rogon ka mukaabala karne ki bhi badi sambhaavana hai. isliye is sandarbh mein ki ja rahi koshishon arthaheen naheen raheingi.

inhein bhi dekhein