saahitya darpan

saahitya darpan sanskrut bhaasha mein likha gaya saahitya vishyak granth hai jiske lekhak pandit vishvanaath hain. vishvanaath ka samay 14veen shataabdi thaharaaya jaata hai. mammat ke kaavyaprakaash ke samaan hi saahityadarpan bhi saahityaalochana ka ek pramukh granth hai. kaavya ke shravya evam drushya donon prabhedon ke sambandh mein is granth mein vichaaron ki vistrut abhivyakti hui hai. isak vibhaajan 10 parichhedon mein hai.

parichay

saahitya darpan 10 parichhedon mein vibhkt hai:

pratham parichhed mein kaavya prayojan, lakshan aadi prastut karte hue granthakaar ne mammat ke kaavya lakshan "tadadoshau shabdaarthon sagunaavanalankruti pun: kvaapi" ka khandan kiya hai aur apne dvaara prastut lakshan vaakyan rasaatmakan kaavyam ko hi shuddhatam kaavya lakshan pratipaadit kiya hai. poorvamatakhandan evam svamatasthaapan ki yeh puraani parampara hai.

dviteeya parichhed mein vaachya aur pad ka lakshan kehne ke baad shabd ki shaktiyon - abhidha, lakshana, tatha vyanjana ka vivechan aur vargeekaran kiya gaya hai.

truteeya parichhed mein ras-nishpatti ka vivechan hai aur rasaniroopan ke saath-saath isi parichhed mein naayak-naayika-bhed par bhi vichaar kiya gaya hai.

chaturth parichhed mein kaavya ke bhed dhvanikaavya aur guneebhoot-vyangyakaavya aadi ka vivechan hai.

pancham parichhed mein dhvani-siddhaant ke virodhi sabhi maton ka tarkapoorn khandan aur iska samarthan hai.

chhathein parichhed mein naatyashaastr se sanbandhit vishyon ka pratipaadan hai. yeh parichhed sabse bada hai aur ismein lagbhag 300 kaarikaaeain hain, jabki sampoorn granth ki kaarika sankhya 760 hai.

saptam parichhed mein dosh niroopan.

ashtam parichhed mein teen gunon ka vivechan.

navam parichhed mein vaidarbhi, gaudi, paanchaali aadi reetiyon par vichaar kiya gaya hai.

dasham parichhed mein alankaaron ka sodaaharan niroopan hai jinmein 12 shabdaalankaar, 70 arthaalankaar aur rasavat aadi kul 89 alankaar parignit hain.

saahityadarpan ki visheshataaeain

iski apni visheshata hai - chhatha parichhed, jismein naatyashaastr se sambaddh sabhi vishyon ka kramabaddh roop se samaavesh kar diya gaya hai. saahitya darpan ka yeh sabse vistrut parichhed hai. kaavyaprakaash tatha sanskrut saahitya ke pramukh lakshan granthon mein naatya sambandhi ansh naheen milte. saath hi naayak-naayika-bhed aadi ke sambandh mein bhi unamein vichaar naheen milte. saahitya darpan ke teesare parichhed mein ras nirupan ke saath-saath naayak-naayika-bhed par bhi vichaar kiya gaya hai. yeh bhi is granth ki apni visheshata hai. poorvavarti aachaaryon ke maton ko yuktipoorn khandanaadi hote hue bhi kaavya prakaash ki tarah jatilta ismein naheen milti.

drushya kaavya ka vivechan ismein naatyashaastr aur dhanik ke dasharoopak ke aadhaar par hai. ras, dhvani aur guneebhoot vyangya ka vivechan adhikaanshat: dhvanyaalok aur kaavya prakaash ke aadhaar par kiya gaya hai tatha alankaar prakaran visheshat: raajaanak ruyyak ke "alankaar sarvasv" par aadhaarit hai. sambhavat: iseeliye in aachaaryon ka matakhandan karte hue bhi granthakaar unhein apna upajeevya maanata hai tatha unke prati aadar vyakt karta hai - "ikshyalamupajeejyamaanaanaan maanyaanaan vyaakhyaateshu kataakshanikshepen" "mahataan sanstav evangauravaaya" aadi.

saahitya darpan mein kaavya ka lakshan bhi apne poorvavarti aachaaryon se svatantr roop mein kiya gaya milta hai. saahitya darpan se poorvavarti granthon mein kathit kaavya lakshan kramash: vistrut hote gaye hain aur chandraalok tak aate-aate unka vistaar atyadhik ho gaya hai, jo is kram se drashtavya hai-

"sankshepaat vaakyamishtaarthavyavachhinna, padaavali kaavyam" (agnipuraan);
"shareeran taavadishtaarthavyavachhinna padaavali" (dandi)
"nanu shabdaarthon kaayam" (rudrat);
"kaavya shabdoyan gunalankaar sanskrutayo: shabdaarthayorvartate" (vaaman);
"shabdaarthashareeram taavat kaavyam" (aanandavardhan);
"nirdoshan gunavat kaavyan alankaarairalankrutam rasaantitm" (bhojaraaj);
"tadadoshau shabdaarthon sagunaavanalankruti pun: kvaapi" (mammat)
"gunaalankaarareetirsasahitau dosharahiti shabdaarthon kaavyam" (vaagbhat); aur
"nirdosha lakshanavi sareetirgunabhooshita, saalankaararasaanekavruttirbhaak kaavyashabdabhaak" (jayadev).

is prakaar kramash: vistrut hote kaavyalakshan ke roop ko saahityadarpanakaar ne "vaakyam rasaatmakam kaavyam" jaise chhote roop mein baaaindh diya hai. keshav mishr ke alankaarashekhar se vyakt hota hai ki saahityadarpan ka yeh kaavya lakshan aachaarya shauddhodani ke "kaavyan rasaadimd vaakyam shrurt sukhavisheshakrut" ka parimaarjit evam sankshipt roop hai.

baahari kadiyaaain