rath yaatra

prasiddh rath yaatra ka ek drushya.

udeesa mein samudra tat par sthit puri ke Bhagwan jagannaath hinduon ke pradhaan devata hai. un ka aakarshan keval nishchit bhaugolik kshetr, sthaan, sanskruti aur raashtreeya star tak hi seemit nahi hai balki videshon mein bhi badi sankhya mein shradhdaalu shreejagannaath ke darshan ke liye puri pahunchate hain. isi liye unhein jagannaath ya brahmaand ka Bhagwan kehte hai. desh, dharm tatha dhaarmik maanyataaon se pare duniya bhar ke anuyaaiyon ka param bhakti se saraabor janasamooh us Dave ki ek jhalak paana chaahata hai jo milan, ekta aur akhandata ki moorti hai.

anukram

sampradaaya

jagannaath sanpradaaya kitna puraana hai tatha yeh kab utpann hua tha is baare mein spasht taur par kuchh nahi kaha ja sakta. vaidik saahitya aur pauraanik kathaaon mein Bhagwan jagannath ya purooshottam ka vishnu ke avataar ke roop mein unki mahima ka gunagaan kiya gaya hai. anya anusandhaan sroton se is baat ke paryaapt saboot hai ki yeh sanpradaaya vaidik kaal se bhi puraana hai. in sroton ke anusaar Bhagwan jagannaath shabar janajaateeya samudaaya se sanbadhit hai aur ve log inki pooja gopaneeya roop se karte the. baad mein unako puri laaya gaya. ve saare brahmaand ke Dave hai tatha ve sabse sanbadhit hai. anek sanpradaayon jaise vaishnav, shaiv, shaakt, ganapati, baudhd tatha jain ne apne dhaarmik sindhdaaton mein samaanata pai hai. jagannaath ji ke bhakton mein saalabeg bhi hai jo janm se muslim tha. Bhagwan jagannath aur unke mandir ne anek sanpradaayon tatha dhaarmik samudaayon ke dharm gurooon ka puri aakarshit kiya hai. aadi shankaraachaarya ne ise govardhan peeth sthaapit karne ke liye chuna. unhonne jagannaathaashtak ka bhi sankalan kiya. anya dhaarmik sant ya dharm guroo jo yahaan aaye tatha Bhagwan jagannaath ki pooja ki unamein maadhavaachaarya, nimbaarkaachaarya, saanyanaachaarya, raamaanuj, raamaanand, tulaseedaas, naanak, kabeer, tatha chaitanya hain aur sthaaneeya sant jaise jagannaath das, balaraam das, achyutaanand, yashavant, shishu anant aur jayadev bhi yahaan aaye tatha Bhagwan jagannaath ki pooja ki. puri mein in santon dvaara math ya aashram sthaapit kiye gaye jo abhi bhi maujood hain tatha kisi na kisi roop mein jagannaath mandir se sanbadhit hain.

katha

pauraanik kathaaon ke anusaar raaja indraghumn Bhagwan jagannaath ko shabar raaja se yahaan lekar aaye the tatha unhonne hi mool mandir ka nirmaan karaaya tha jo baad mein nasht ho gaya. is mool mandir ka kab nirmaan hua aur yeh kab nasht ho gaya is baare mein pakke taur par kuchh bhi spasht nahi hai. yayaati keshari ne bhi ek mandir ka nirmaan karaaya tha. maujooda 65 meter oonche mandir ka nirmaan 12veen shataabdi mein cholagangadev tatha anangabheemadev ne karaaya tha. parantu jagannaath sanpradaaya vaidik kaal se lekar ab tak maujood hai. maujooda mandir mein Bhagwan jagannaath ki pooja unke bhaai balabhadr tatha bahan subhadra ke saath hoti hai. in moortiyon ke charan naheen hai. keval Bhagwan jagannaath aur balabhadr ke haath hai lekin unamein kalaai tatha oongaliyaan naheen hain. ye moortiyaan neem ki lakdi ki bani hui hai tatha inhein pratyek baarah varsh mein badal diya jaata hai. in moortiyon ke baare mein anek maanyataaen tatha lokakathaaen prachalit hai. yeh mandir 20 feet oonchi deevaar ke parakote ke bheetar hai jismein anek chhote-chhote mandir hai. mukhya mandir ke alaava ek paranparaagat dayodhi, pavitra devasthaan ya garbhagruh, praarthana karne ka hall aur stambhon wala ek nrutya hall hai. sadiyon se puri ko anek naamon se jaana jaata hai jaise, neelagiri, neelaadri, neelaachal, purooshottam, shankhakshetr, shreekshetr, jagannaath dhaam aur jagannaath puri. yahaan par baarah mahatvapoorn tyauhaar manaaye jaate hain. lekin inmein sabse mahatvapoorn tyauhaar jisne antarraashtreeya khyaati praapt ki hai vah rathayaatra hi hai.

yaatra

yeh yaatra aashaadh maheene (June-July) me aata hai. Bhagwan jagannaath apne bhaai balabhadr tatha bahan subhadra ke saath gudicha mandir par vaarshik bhraman par jaate hai jo unke ek sage sanbadhi ka ghar hai. ye teenon Dave vahaan ke liye apni yaatra saje sanvare rathon par savaar hokar karte hain, iseeliye ise rath yaatra athva rath mahotsav kehte hain. in teenon devon ke rath alag-alag hote hain jinhein unke bhakt gundicha mandir tak kheenchate hain. nandeeghosh naamak rath 45.6 feet ooncha hai jisme Bhagwan jagannaath savaar hote hain. taaladhvaj naamak rath 45 feet ooncha hai jisme Bhagwan balabhadr savaar hote hain. darpadalan naamak rath 44.6 feet ooncha hai jisme devi subhadra savaar hoti hai. ye rath bade hi vishaal hote hain tatha inhein rath mein savaar Dave ke saanketik rangon ke anusaar hi sajaaya jaata hai. devon ko laane ke liye in rathon ko mandir ke baahar ek parampara ke anusaar hi khada kiya jaata jise pahandi beeje kehte hain. gajapati svarnim jhaadu se safaai karta hai. keval tabhi rathon ki kheencha jaata hai. ye teenon Dave gundicha mandir mein saat dinon tak vishraam karte hain aur fir isi tarah se unhein vaapas unke mukhya mandir mein laaya jaata hai. is prakaar nau dinon tak chalne wala yeh rath mahotsav samaapt hota hai. yeh anonkha rath mahotsav kab se shuroo hua kisi ko pata naheen hai. jabki rath shabd rigved tatha atharvaved mein bhi aaya hai tatha Bhagwan soorya ka rath par savaar hone ko bhi pauraanik kathaaon mein varnit hai. abhi bhi kuchh anusandhaanakarta is rath mahotsav ko baudhd parampara se jodte hain.

mahatva

is rath mahotsav ka sabse jyaada mahatva yeh hai ki isse bhaktajanon ko apne priya aaraadhya Dave ki ek jhalak mil jaati hai. jaise Bhagwan aam janta se milne ke liye apne mandir se baahar aaye ho. yeh rath mahotsav behad lokapriya ho gaya hai aur isne itna mahatva praapt kar liya hai ki ab yeh keval puri tak hi seemit naheen hai. isi prakaar ke rath mahotsav desh ke alag-alag sthaanon par tatha videsh mein bhi manaaye jaate hain. Bhagwan jagannaath ki pooja udeesa ke logon ki bhaavanaaon se is prakaar gaharaai se jud gayi hai ki har koi vyakti lagbhag pratyek gaanv tatha shahar mein jagah-jagah jagannaath mandir rath mahotsav ko dekh sakta hai. Bhagwan jagannaath tatha unka rath mahotsav milan, ekta tatha akhandata ka prateek hai. yadyapi ve puri mein viraajamaan hain fir bhi ve is sampoorn brahmaand ke Bhagwan hain tatha unka prabhaavashaali chitaakarshan saarvabhaumik hai. sabhi log unase sambandhit hain evam ve sabhi se sambandhit hain. unke vishaal netron ke saamanein sabhi baraabar hain.

rath yaatra aur nav kaalebaada puri ke prasiddh parv hain. ye donon parv Bhagwan jagannaath ki mukhya moorti se sambaddh hain. nav kaalebaada parv bahut hi mahatvapoorn dhaarmik anushthaan hai, teenon moortiyon- Bhagwan jagannaath, balabhadr aur subhadra ka baahari roop badla jaata hai. in nae roopon ko vishesh roop se sugandhit chandan-neem ke pedon se nirdhaarit kadi dhaarmik reetiyon ke anusaar sugandhit kiya jaata hai. is dauraan poore vidhi-vidhaan aur bhavya tareeke se 'daaru' (lakdi) ko mandir mein laaya jaata hai.

is dauraan vishvakarma (lakdi ke shilpi) 21 din aur raat ke liye mandir mein pravesh karte hain aur nitaant gopaneeya dhang se moortiyon ko antim roop dete hain. in nae aadarsh roopon mein se pratyek moorti ke nae roop mein 'brahma' ko pravesh karaane ke baad use mandir mein rakha jaata hai. yeh kaarya bhi poorn dhaarmik vidhi-vidhaan se kiya jaata hai.