raashtreeya sikh sangat

raashtreeya sikh sangat ek saamaajik-saanskrutik sanstha hai jo guroo granth saahab ke sandeshon ko poore bhaarateeya upamahaadveep mein prasaarit karne ke lakshya ke saath kaam kar rahi hai. sangat ka maanana hai ki guroo granth saahab keval sikhon ka hi naheen varan sampoorn bhaarateeya upamahaadveep ka pavitra dharmagranth hai.

raashtreeya sikh sangat poori tarah saamaajik evam saanskrutik manch hai, na ki paanthik. iska mukhya uddeshya hai saamaajik samarasata paida karna aur sikh parampara, sikh itihaas ko jan-jan tak pahunchaana. ullekhaneeya hai ki sikhon ka bada tejasvi itihaas raha hai. desh aur dharm ke liye mar mitne ki parampara inki rahi hai. bade to bade, bachche bhi desh-panth ke liye shaheed hue hain. guru govind Singh ji ke do putron joraavar Singh (9) tatha fateh Singh (7) ko mugalon ne deevaar mein chunava diya tha. apne anya do putron-ajeet Singh aur jujhaar Singh ko guru govind Singh ji ne apne haathon se yuddh ke liye sajaaya tha aur mugalon ki bhaari-bharakam sena ke khilaaf unhein maidaan mein utaara tha. ve donon saahibjaade bhi bade veer the. yuddh ke maidaan mein veerata dikhaate hue veeragati ko praapt hue the. sach kaha jaae jo aise hi veeron aur shaheedon ke kaaran mugalon ke atyaachaaron se uttar Bhaarat mein hinduon ki raksha ho pai. naheen to kya hota, isko alakaadhar Khan yogi ne kaha hai-

na kahoon abaki, na kahoon tabaki.
hote na govind Singh,
to sunnat hoti sabki.

sikhon ke isi itihaas ko ghar-ghar tak pahunchaane ka kaarya raashtreeya sikh sangat pichhle 25 saal se kar rahi hai. is nimitt poore desh mein sangoshthiyaan evam anya kaaryakram hote rahate hain.

itihaas

raashtreeya sikh sangat ki sthaapana 24 November san 1986 ko guroo naanak ji ke prakaash parv ke din hui thi. Lucknow ke svargeeya shamasher Singh ji iske pratham raashtreeya evam antararaashtreeya samanvak the. unhone chaar varsh tak Bhaarat evam videshon ki saghan yaatra ki.

raashtreeya sikh sangat ki sthaapana ki prushthabhoomi mein 1984 ke sikh virodhi narasanhaar rahe hain. sangat ke raashtreeya mahaamantri (sangathan) shri Avinash jaayasavaal bataate hain ki 1984 mein pradhaanamantri shreemati indira Gandhi ki hatya ke baad 4 hajaar se adhik sikh bandhu maare gaye the. isse raashtravaadi vichaaradhaara ke log bade chintit hue, kyonki is vichaaradhaara ko bachaane mein sikhon ka bahut bada yogadaan raha hai. aise logon ka maanana tha ki hindu dharm ki raksha ke liye hi khaalasa panth ki sthaapana hui thi. yaani sikh, hindutv ke rakshak rahe hain.

hindutv ke in rakshakon ki saamoohik hatya se desh mein ek vichitr sthiti utpann ho gayi thi. sikh bhaai naaraaj the. at: anek raashtravaadi sangathanon ne raashtreeya swayamsevak sangh ke tatkaaleen netrutv se sampark kiya aur unase nivedan kiya ki samaaj mein kisi bhi jaati, panth ke saath aisi ghatna na ghate, unka manobal na toote isliye ek sashakt manch banaaen. kaafi vichaar-manthan ke pashchaat raashtreeya sikh sangat ki sthaapana 1986 mein amrutasar ki paavan dharati par ki gayi. avsar tha, shreeguru naanakadev ji ka prakaash parv. is nimitt ek garimaamaya kaaryakram ka aayojan hua tha aur usaki adhyakshata ki thi Lucknow ke prasiddh sikh vidvaan sardaar shamasher Singh ne. yahi raashtreeya sikh sangat ke pratham adhyaksh bhi bane. iske baad varishth prachaarak sardaar chiranjeev Singh ko adhyaksh ka daayitv diya gaya. inke samay mein sangat ki desh mein ek vishisht pehchaan bani. vartamaan mein Jaipur ki ek prasiddh hasti sardaar gurucharan Singh gil sangat ke raashtreeya adhyaksh hain.

kaarya

sikh sangat ke kaaryon ka aadhaar hai "shreegurugranth saahib". ullekhaneeya hai ki yeh granth saamaajik samarasata aur ekta ka sandesh deta hai aur ismein poore Bhaarat ka pratinidhitv bhi hua hai. ismein 6 guruon, 15 bhakton aur 15 bhatton ki vaaniyaan hain. ye guru, bhakt aur bhatt anek jaatiyon, anek panthon aur Bhaarat ke anek sthaanon se jude hain.

shreegurugranth saahib ke sandeshon ko sar-maathe par lekar sangat ke kaaryakarta poore desh mein saamaajik samarasata ka vaataavaran taiyaar kar rahe hain aur desh ki ekta ko majabooti de rahe hain. sangat ka maanana hai ki sikh samaaj ke adhikaansh log desh-dharm par mar mitne vaale, sevaabhaavi aur inasaaniyt ke maseeha hain. isi vichaar aur bhaavana ke saath sangat ke kaaryakarta sikh samaaj se sampark aur samvaad sthaapit karte hain.

raashtreeya sikh sangat ne apne 25 varsh ke itihaas mein anek bade aayojan kiye hain, jinse samaaj ko ek nai disha aur soch mili hai. kuchh varsh poorv nai Delhi mein sangat ne un bhakton aur bhatton ke vanshajon ko sammaanit kiya tha, jinki vaani shri gurugranth saahib mein hain. 300 saala guruta gaddi varsh ke avsar par shri hajoor saahib (naanded) mein sangat dvaara langar ka aayojan kiya gaya. iske alaava shaheedi pradarshani, shastr pradarshani aadi bhi aayojit hurin. isse poorv mumbai mein raashtreeya swayamsevak sangh ke svayansevakon ne pathasanchalan kiya aur daadar sthit gurudvaare mein mattha teka.

sikh sangat ke prayaas se hi do saal poorv shri guru govind Singh dvaara auranjageb ko likhe gaye patra "jafaranaama" par nai Delhi mein sangoshthi hui aur usaka hindi anuvaad bhi pustakaakaar mein prakaashit kiya gaya. ullekhaneeya hai ki shri guru govind Singh ji ne "jafaranaama" ke maadhyam se aurangajeb ko usaki kamiyaan ginaai theen aur use chetaaya bhi tha. guruon ki vaani ko logon tak pahunchaane ke liye raashtreeya sikh sangat ki ek maasik patrika "sangat sansaar" bhi hai.

baahari kadiyaaain